“முதல்வருக்கே தெரியாமல் அரசாணையா?” – ஆதவை வெளுத்து வாங்கும் பெ.சண்முகம்!

பட்டினப்பாக்கத்தில் புதிய தலைமைச் செயலகம் அமைக்கும் விவகாரம் தமிழ்நாடு அரசியலில் தொடர்ந்து விவாதப் பொருளாகி வருகிறது. இந்த நிலையில், “முதலமைச்சர் விஜய் இறுதி முடிவே எடுக்கவில்லை என்றால், புதிய தலைமைச் செயலகம் தொடர்பாக அரசாணை எப்படி வெளியானது?” என்று மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகம் கேள்வி எழுப்பியுள்ளார்.

சென்னையில் செய்தியாளர்களிடம் பேசிய அவர், புதிய தலைமைச் செயலகம் தொடர்பாக அரசுத் தரப்பில் வெளியான அரசாணை எண் 564-ஐ சுட்டிக்காட்டினார். சீனிவாசபுரத்தில் புதிய தலைமைச் செயலகம் அமைப்பது தொடர்பான அரசின் முடிவை அந்த அரசாணை வெளிப்படுத்துவதாக அவர் கூறினார்.

முதலமைச்சர் விஜய் இதுவரை இறுதி முடிவை எடுக்கவில்லை என ஆதவ் அர்ஜுனா கூறியிருக்கும் நிலையில், முதலமைச்சரின் ஒப்புதல் இல்லாமல் இத்தகைய அரசாணை எப்படி வெளியாக முடியும் என்பதே பெ.சண்முகத்தின் கேள்வி.

“முதலமைச்சருக்கு தெரியாமல் அரசாணை வெளியானது என்றால், அதற்குக் காரணமான அதிகாரிகள் மீது நடவடிக்கை எடுக்க வேண்டும். முதலமைச்சரின் ஒப்புதலுடன் வெளியிடப்பட்டிருந்தால், அந்த முடிவை மறுபரிசீலனை செய்ய வேண்டும்” என்பதே அவரது வாதம்.

மேலும், தலைமைச் செயலகம், சட்டப்பேரவை, எம்எல்ஏக்கள் குடியிருப்பு போன்ற நீண்ட காலப் பயன்பாட்டுக்கான கட்டமைப்புகள் மக்கள் வசதிக்கு பாதிப்பு ஏற்படாத இடத்தில் உருவாக்கப்பட வேண்டும் என்றும் அவர் வலியுறுத்தினார்.

குறிப்பாக, புதிய தலைமைச் செயலகத்துக்காக மீனவர் குடியிருப்புகள் பாதிக்கப்படும் வகையில் இடம் தேர்வு செய்வது சரியான அணுகுமுறை அல்ல என்று மார்க்சிஸ்ட் கம்யூனிஸ்ட் கட்சி கருதுவதாக அவர் தெரிவித்தார். சென்னைக்குள் மாற்று இடங்கள் இருப்பதாகவும், அவற்றை அரசிடம் தாங்கள் தெரிவித்துள்ளதாகவும் கூறினார்.

“தவெக அரசுக்கு எதிரான போராட்டம் இல்லை!”

பட்டினப்பாக்கம் விவகாரத்தில் தங்களது எதிர்ப்பு தமிழக வெற்றிக் கழக அரசுக்கு எதிரான அரசியல் நடவடிக்கை அல்ல என்றும் பெ.சண்முகம் விளக்கம் அளித்தார்.

எந்தக் கட்சி ஆட்சியில் இருந்தாலும், மக்கள் நலனை பாதிக்கும் ஒரு முடிவு எடுக்கப்பட்டால் தங்களது நிலைப்பாடு இதேபோலத்தான் இருக்கும் என்று அவர் குறிப்பிட்டார்.

இதற்கிடையே, முந்தைய திமுக ஆட்சியில் இடதுசாரிகள் இதுபோன்ற போராட்டங்களை பெரிய அளவில் முன்னெடுக்கவில்லை என்ற விமர்சனத்தையும் அவர் நிராகரித்தார். சாம்சங் தொழிலாளர் போராட்டம், அனகாபுத்தூரில் வீடுகள் இடிப்பு விவகாரம், சேப்பாக்கம்–திருவல்லிக்கேணி குடிசை அகற்றும் நடவடிக்கை உள்ளிட்ட பல்வேறு பிரச்சனைகளில் மார்க்சிஸ்ட் கம்யூனிஸ்ட் கட்சி போராட்டங்களை நடத்தியதாக அவர் பட்டியலிட்டார்.

அதேபோல், 8 மணி நேர வேலை நேரம் தொடர்பாக திமுக ஆட்சியில் கொண்டுவரப்பட்ட சட்டத்துக்கும் தங்கள் கட்சி சட்டமன்றத்திலேயே எதிர்ப்பு தெரிவித்ததாக அவர் கூறினார். மற்ற தோழமைக் கட்சிகளின் உறுப்பினர்களையும் இணைத்து எதிர்ப்பு தெரிவித்து, தொழிற்சங்கங்களை ஒருங்கிணைத்து போராட்டம் நடத்தப்பட்ட பின்னரே அந்தச் சட்டம் திரும்பப் பெறப்பட்டதாக பெ.சண்முகம் தெரிவித்தார்.

விஜய் அரசுக்கு என்ன அறிவுரை?

தொடர்ந்து தமிழக வெற்றிக் கழக ஆட்சியின் செயல்பாடு குறித்த கேள்விக்கு பதிலளித்த பெ.சண்முகம், ஆட்சியில் ஜனநாயகப்பூர்வமான அணுகுமுறை அதிகம் தேவைப்படுவதாகக் கூறினார். முக்கியமான முடிவுகளை எடுக்கும்போது சம்பந்தப்பட்ட தரப்புகளுடன் ஆலோசனை நடத்துவதும், கருத்து வேறுபாடுகளுக்கு இடமளிப்பதும் அரசின் செயல்பாட்டில் இருக்க வேண்டும் என்பது அவரது கருத்தாக இருந்தது.

பல விஷயங்களில் அரசுத் தரப்பில் முன்கூட்டியே அறிவிப்புகள் வெளியிடப்படுவதாகவும், போதிய கலந்துரையாடல் நடைபெறவில்லை என்றும் அவர் விமர்சித்தார். இதனால், “புதிய தலைமைச் செயலகம் எங்கே அமையப் போகிறது?” என்ற கேள்வியைத் தாண்டி, “அரசாணை யாருடைய ஒப்புதலுடன் வெளியானது?” என்ற கேள்வியும் தற்போது அரசியல் களத்தில் முக்கியத்துவம் பெற்றுள்ளது.