34 ஆயிரம் இருக்கைகள்... 84 லட்சம் விண்ணப்பங்கள்! இந்தியா - பாகிஸ்தான் போட்டிக்கு இப்படியொரு மவுசா?

ஒருநாள் உலகக் கோப்பை கிரிக்கெட் தொடர் 24 ஆண்டுகளுக்குப் பிறகு மீண்டும் ஆப்பிரிக்காவுக்குத் திரும்புகிறது. தென்னாப்பிரிக்கா, ஜிம்பாப்வே மற்றும் நமீபியா ஆகிய நாடுகள் இணைந்து இந்தத் தொடரை நடத்துகின்றன. இதில் 14 அணிகள் பங்கேற்கின்றன. மொத்தம் 12 மைதானங்களில் 57 போட்டிகள் நடைபெறவுள்ளன.

2027 ஒருநாள் உலகக் கோப்பையில் இந்தியா மற்றும் பாகிஸ்தான் அணிகளுக்கு இடையிலான போட்டி பெரும் ஆர்வத்தை ஏற்படுத்தியுள்ளது. கிரிக்கெட் காலண்டரில் இந்தியா-பாகிஸ்தான் இடையிலான போட்டி மிகவும் எதிர்பார்க்கப்படும் மற்றும் அதிக வருவாய் ஈட்டித் தரும் போட்டியாக இருந்து வருகிறது. கடந்த 9 மோதல்களிலும் இந்தியாவே வெற்றி பெற்று, இந்த ஆட்டங்களில் ஆதிக்கம் செலுத்தி வருகிறது. இந்த இரு பரம எதிரிகளுக்கு இடையிலான போட்டியை நேரில் காண சர்வதேச கிரிக்கெட் கவுன்சிலுக்கு (ICC) 84 லட்சம் டிக்கெட் விண்ணப்பங்கள் வந்துள்ளன. அக்டோபர் 10ஆம் தேதி ஜோகன்னஸ்பர்க்கில் உள்ள வாண்டரர்ஸ் மைதானத்தில் இந்தப் போட்டி நடைபெறவுள்ளது. குறிப்பிடத்தக்க விஷயம் என்னவென்றால், இந்த மைதானத்தின் இருக்கை கொள்ளளவு 34,000 மட்டுமே; ஆனால், வந்திருக்கும் விண்ணப்பங்களின் எண்ணிக்கை இந்த அளவை விட பல மடங்கு அதிகமாக உள்ளது.

இதே மைதானத்தில் தான் நவம்பர் 21ஆம் தேதி அன்று இறுதிப் போட்டியும் நடைபெறவுள்ளது. இந்தப் போட்டிக்கு கிட்டத்தட்ட 79 டிக்கெட் விண்ணப்பங்கள் வந்துள்ளன. அக்டோபர் 2 முதல் நவம்பர் 21 வரை நடைபெறவுள்ள, 14 அணிகள் பங்கேற்கும் இந்த உலகக் கோப்பைத் தொடருக்காக மொத்தம் 12 கோடிக்கும் (120 மில்லியன்) அதிகமான டிக்கெட்டுக்கான விண்ணப்பங்கள் வந்துள்ளன.

இந்தியா மற்றும் பாகிஸ்தான் அணிகள் ஆஸ்திரேலியா, ஆப்கானிஸ்தான், ஜிம்பாப்வே மற்றும் தகுதிச் சுற்றில் தேர்வாகும் ஒரு அணியுடன் ஒரே குழுவில் உள்ளனர். அதேபோல், இங்கிலாந்து, தென்னாப்பிரிக்கா, வங்கதேசம், இலங்கை, நியூசிலாந்து மற்றும் தகுதிச் சுற்றில் தேர்வாகும் மற்றொரு அணியுடன் மற்றொரு குழுவில் இடம்பெற்றுள்ளது.

இந்த இரு குழுக்களிலிருந்தும் முதல் மூன்று இடங்களைப் பிடிக்கும் அணிகளும், நான்காவது இடத்தைப் பிடித்த அணிகளில் சிறந்த அணியும் 'சூப்பர் 7' சுற்றுக்கு முன்னேறும். அங்கிருந்து, முதல் நான்கு இடங்களைப் பிடிக்கும் அணிகள் அரையிறுதிக்குத் தகுதி பெறும்.

உலகக் கோப்பையின் வடிவத்தைக் கருத்தில் கொண்டால், இந்தியா மற்றும் பாகிஸ்தான் அணிகள் மூன்று முறை நேருக்கு நேர் மோத வாய்ப்புள்ளது. முதலாவதாக குழுச் சுற்றிலும், இரு அணிகளும் தகுதி பெற்றால் சூப்பர் 7 சுற்றில் இரண்டாவது முறையாகவும் அவை மோதலாம். மேலும், இரு அணிகளும் தகுதி பெறும் பட்சத்தில், அரையிறுதி அல்லது இறுதிப் போட்டியில் மூன்றாவது முறையாகவும் அவை ஒன்றையொன்று எதிர்கொள்ளக்கூடும்.

ஆண்கள் மற்றும் பெண்கள் பங்கேற்கும் சர்வதேசப் போட்டிகளில் பாகிஸ்தானுக்கு எதிராக விளையாடிய கடந்த 16 போட்டிகளிலும் இந்தியா வெற்றி பெற்றுள்ளது. பாகிஸ்தான் கடைசியாக இந்தியாவுக்கு எதிராக 2022 ஆசியக் கோப்பையின் போது வெற்றி பெற்றிருந்தது.

டிக்கெட் விண்ணப்பங்கள் நவம்பர் 21 வரை ஏற்றுக்கொள்ளப்படும்

டிக்கெட் விண்ணப்பிக்கும் செயல்முறை 2026 நவம்பர் 21 வரை தொடரும். விண்ணப்பதாரர்கள் முதலில் பதிவு செய்ய வேண்டும். டிக்கெட்டுகளுக்கான தேவை, கிடைக்கும் எண்ணிக்கையை விட அதிகமாக இருந்தால், கணினி மூலம் குலுக்கல் முறையில் வெற்றியாளர்கள் தேர்ந்தெடுக்கப்பட்டு, அவர்களுக்கு டிக்கெட்டுகளை வாங்கும் வாய்ப்பு வழங்கப்படும். இது 'முதலில் வருபவருக்கே முன்னுரிமை' என்ற அடிப்படையில் செயல்படும் முறை அல்ல.

முன்பும் கிரிக்கெட் டிக்கெட்டுகள் குலுக்கல் முறையிலேயே வழங்கப்பட்டன

2011 ஒருநாள் உலகக் கோப்பை - இந்தியாவில், அரையிறுதி மற்றும் இறுதிப் போட்டிகளுக்கான டிக்கெட்டுகளை வழங்க ஐசிசி (ICC) பொதுக் குலுக்கல் முறையைப் பயன்படுத்தியது. இணையதளத்தில் அதிகப்படியான பயனர்கள் ஒரே நேரத்தில் நுழைந்ததால், டிக்கெட் விற்பனையில் சிக்கல்கள் ஏற்பட்டன.

2016 டி20 உலகக் கோப்பை - இந்திய அணியின் அரையிறுதி மற்றும் இறுதிப் போட்டிகளுக்கான டிக்கெட்டுகளை வழங்க குலுக்கல் முறை பயன்படுத்தப்பட்டது. இதில் தேர்ந்தெடுக்கப்பட்ட விண்ணப்பதாரர்களுக்கு டிக்கெட்டுகளை வாங்கும் வாய்ப்பு வழங்கப்பட்டது.

2019 ஒருநாள் உலகக் கோப்பை - ஐசிசி டிக்கெட் குலுக்கல் முறையை இரண்டு கட்டங்களாக நடத்தியது. இதில் 'கிரிக்கெட் குடும்பம்' (cricket family) சார்ந்தவர்களுக்கான குலுக்கல் மற்றும் பொது மக்களுக்கான குலுக்கல் என இரு பிரிவுகள் இருந்தன.

2024 டி20 உலகக் கோப்பை - ஐசிசி பொது டிக்கெட் குலுக்கல் முறையை நடத்தியது. இதில் இந்தியா-பாகிஸ்தான் இடையிலான போட்டிக்கான தேவை, இருந்த இருக்கைகளின் எண்ணிக்கையை விட 200 மடங்கு அதிகமாக இருந்தது.