நடிகர் ரஜினிகாந்த் 75-வது பிறந்தநாள் : பிரதமர் மோடி, முதல்வர் ஸ்டாலின் உள்ளிட்டோர் வாழ்த்து 

பல தலைமுறைகளை கவர்ந்தவர்:  பிரதமர் மோடி  

நடிகர் ரஜினிகாந்துக்கு பிரதமர் நரேந்திர மோடி எக்ஸ் தளத்தில் பிறந்தநாள் வாழ்த்து தெரிவித்துள்ளார். ரஜினிகாந்த் தனது நடிப்பாற்றலால் பல தலைமுறைகளை கவர்ந்துள்ளார். ரஜினிகாந்தின் திரையுலக படைப்புகள் பல்வேறு பாத்திரங்கள் மற்றும் பாணிகளில் பரவி தொடர்ச்சியான முத்திரை பதித்துள்ளன. நடிகர் ரஜினிகாந்த் நீண்டகாலம், ஆரோக்கியமான வாழ்க்கை வாழ பிரார்த்திக்கிறேன் என பிரதமர் மோடி வாழ்த்து தெரிவித்துள்ளார்.

கள்ளம் கபடமற்றவர் : முதல்வர் ஸ்டாலின்

முதலமைச்சர் மு.க.ஸ்டாலின் எக்ஸ் தள பதிவில் தெரிவித்திருப்பாதாவது; ரஜினிகாந்த் = வயதை வென்ற வசீகரம்! மேடையில் ஏறினால் அனைவரையும் மகிழ்விக்கும் சொல்வன்மை!உள்ளொன்று வைத்துப் புறமொன்று பேசாத கள்ளம் கபடமற்ற நெஞ்சம்!

ஆறிலிருந்து அறுபதுவரைக்கும் அரைநூற்றாண்டாகக் கவர்ந்திழுக்கும் என் நண்பர் சூப்பர் ஸ்டார் ரஜினிகாந்த் அவர்களுக்கு உளம் நிறைந்த பிறந்தநாள் வாழ்த்துகள்! மென்மேலும் பல வெற்றிப் படைப்புகளை அளித்து, மக்களின் அன்போடும் ஆதரவோடும் தங்கள் வெற்றிக்கொடி தொடர்ந்து பறக்கட்டும்! இவ்வாறு வாழ்த்து தெரிவித்துள்ளார்.

 Style Magic : எதிர்கட்சி தலைவர் எடப்பாடி 

அதிமுக பொதுச்செயலாளார் எடப்பாடி பழனிசாமி தனது எக்ஸ் வலைதளத்தில் கூறியிருப்பதாவது:-

தமிழ்த் திரையுலகின் அசைக்க முடியாத பேராளுமையாக 50 ஆண்டுகளாக கோலோச்சி வரும் சூப்பர்ஸ்டார் ரஜினிகாந்த் அவர்களுக்கு எனது இதயங்கனிந்த பிறந்தநாள் நல்வாழ்த்துகள். திரையரங்குகளை திருவிழாக் கூடங்களாக மாற்றவல்ல தங்களின் Style Magic ரசிகர்களை மகிழ்விக்கட்டும் பல்லாண்டு!

ரசிகர்கள் உற்சாகம் 

ரஜினியின் 75வது பிறந்தநாளையொட்டி அவரது படையப்பா திரைப்படம் இன்று தமிழகம் முழுவதும் வெளியாகி உள்ளது. காலை முதலே திரையரங்குகளில் ரஜினி ரசிகர் குவிந்த உற்சாக கொண்டாட்டத்தில் ஈடுபட்டு வருகின்றனர். 

மேலும் கோயிலில் சிறப்பு பூஜை, அன்னதானம் உள்ளிட்ட பல்வேறு நிகழ்ச்சிகளையும் ரஜினி ரசிகர்கள் தமிழகம் முழுவதும் செய்து வருகின்றனர். 

மக்கள் நீதி மய்யம் தலைவர் கமல்ஹாசன் உள்பட அரசியல் கட்சி தலைவர்கள், திரையுலகினர் ரஜினிகாந்திற்கு பிறந்தநாள் வாழ்த்துக்களை தெரிவித்துள்ளனர்.