நயினாருடன் ஸ்டாலின் நெருக்கம்... பாஜக - திமுக கூட்டணிக்கான சிக்னலா?

திருமண வரவேற்பு நிகழ்ச்சிக்கு நயினார் நாகேந்திரன் வந்தபோது, திமுகவைச் சேர்ந்த முன்னணி நிர்வாகிகள் மற்றும் முன்னாள் அமைச்சர்கள் அவரை வரவேற்றனர். குறிப்பாக பொன்முடி, கே.கே.எஸ்.எஸ்.ஆர். ராமச்சந்திரன் உள்ளிட்டோர் நயினார் நாகேந்திரனுடன் நெருக்கமாக உரையாடியதாக கூறப்படுகிறது.

திமுக - பாஜக இடையே கடந்த சில காலமாக அரசியல் ரீதியான நெருக்கம் அதிகரித்து வருவதாக பல்வேறு தகவல்கள் வெளியாகி வருகின்றன. தொகுதி மறுவரையறை விவகாரம் உள்ளிட்ட தேசிய அளவிலான பிரச்னைகளில் இரு கட்சிகளின் நிலைப்பாடுகள் குறித்தும் அரசியல் கட்சிகள் விமர்சனங்களை முன்வைத்து வருகின்றன. இதற்கிடையே, தொகுதி மறுவரையறை தொடர்பான தீர்மானத்தில் தனது நிலைப்பாட்டை திமுக ஏற்கனவே வெளிப்படையாக அறிவித்துள்ளது.

மேலும், மத்திய அமைச்சரவை மாற்றம் தொடர்பான பேச்சுகளிலும் திமுக இடம்பெறும் என்ற தகவல்கள் அவ்வப்போது அரசியல் களத்தில் உலா வருகின்றன. தமிழக அரசியலில் திமுகவின் சமீபத்திய விமர்சனங்கள் பெரும்பாலும் தவெகவை மையப்படுத்தியதாக இருப்பதும் கவனிக்கப்படுகிறது. ஆட்சியில் இருந்தபோது பாஜகவை கடுமையாக எதிர்த்த திமுக, தற்போது நெருக்கம் காட்டத் தொடங்கியுள்ளதுதான் தவெக எடுத்துள்ள புதிய அஸ்திரம் என்கின்றனர் அரசியல் விமர்சகர்கள். 

இதேநேரத்தில், நயினார் நாகேந்திரன் சமீபத்தில் டெல்லி சென்றது குறித்தும் அரசியல் வட்டாரத்தில் பல்வேறு எதிர்பார்ப்புகள் உருவாகியுள்ளன. அவர் மத்திய இணையமைச்சராக வாய்ப்பு பெறலாம் என்றும், தமிழக பாஜக தலைவர் வானதி சீனிவாசனுக்கு கொடுக்கப்படலாம் என்றும் பேச்சுகள் எழுந்துள்ளன.

இந்தச் சூழலில், மனோஜ் பாண்டியன் இல்லத் திருமண வரவேற்பில் ஸ்டாலின் - நயினார் நாகேந்திரன் சந்திப்பு நடைபெற்றிருப்பது கூடுதல் அரசியல் முக்கியத்துவத்தைப் பெற்றுள்ளது. இருவரும் சந்தித்து கைகுலுக்கிய காட்சி, திமுக - பாஜக இடையிலான எதிர்கால அரசியல் நகர்வுகள் குறித்து மீண்டும் விவாதங்களை கிளப்பியுள்ளது.

எனினும், இந்தச் சந்திப்பை கூட்டணி தொடர்பான உறுதியான முடிவாகக் கருத முடியாது என்றும், இது திருமண நிகழ்ச்சியில் நடைபெற்ற ஒரு இயல்பான அரசியல் சந்திப்பாக மட்டுமே இருக்கலாம் என்றும் திமுக - பாஜக வட்டாரங்களைச் சேர்ந்தவர்கள் கருதுகின்றனர். இருப்பினும், தற்போதைய அரசியல் சூழலில் இரு கட்சிகளின் தலைவர்கள் ஒரே நிகழ்ச்சியில் காட்டிய நெருக்கம் பேசுபொருளாகியுள்ளது.