வன்மத்தை கக்குவோருக்கு... சரமாரி பதிலடி கொடுத்த திருமா

காழ்ப்புணர்வால் வன்மம் கக்குவோரைக் கண்டும் காணாமல் கடந்து செல்வோம் என விசிக தலைவர் திருமாவளவன் தெரிவித்துள்ளார்.

தமிழகத்தில் 2026 சட்டமன்றத்தேர்தல் நடைபெற உள்ளது. இந்த நிலையில், தேர்தலுக்கான பேச்சுவார்த்தைகள் தற்போதே தொடங்கியுள்ளது. இதனால் எந்த கூட்டணியில் கட்சிகள் இடம்பெற உள்ளன என்ற கேள்வி எழுந்துள்ளது. இந்த நிலையில் சமீபத்தில், விழுப்புரத்தில் விசிக சார்பில் நடந்த மது ஒழிப்பு மாநாட்டில் திருமாவளவனின் பேச்சு தமிழக அரசியல் களத்தில் பெரும் பேசுபொருளானது. இந்த மாநாட்டில் பேசிய திமுக தலைவர்களும் திமுக கூட்டணியிலேயே விசிக தொடரும் எனவும் திமுக-விசிக கூட்டணி என்பது வெறு கூட்டணி அல்ல அது கொள்கை சார்ந்த கூட்டணி என தெரிவித்தனர். இதைத்தொடர்ந்து, கூட்டணி ஆட்சியில் பங்கு என திருமாவின் எக்ஸ் பதிவு பெரும் பரபரப்பை ஏற்படுத்தியது. இதற்கு பல்வேறு தரப்பில் ஆதரவு எழுந்தது.

இதையடுத்து, விழுப்புரம் விக்கிரவாண்டி வி.சாலையில் நடந்த தவெக பிரமாண்ட மாநாட்டில் பேசிய அக்கட்சியின் தலைவர் விஜய், 2026ல் நம்மை நம்பி வரும் கட்சிகளுடன் கூட்டணி அமைக்கப்படும் என்றும் ஆட்சி அதிகாரத்தில் பங்கு கொடுக்கப்படும் எனவும் அறிவித்தார். மேலும் ஆளும் திமுக அரசை கடுமையாக விமர்சனம் செய்தார்.

இதனால் தவெக தலைவர் விஜய் 2026 சட்டமன்றத் தேர்தலில் விசிக உள்ளிட்ட கட்சிகளுடன் கூட்டணி அமைய உள்ளதாகவும், திமுக கூட்டணியில் இருந்து விசிக வெளியேறும் எனவும் தகவல்கள் வெளியானது. ஆனால் இதனை திருமாவளவன் மறுத்தார். அடுத்த தேர்தலிலும் திமுக தலைமையிலான கூட்டணியில் தான் விசிக தொடரும் என அறிவித்தார். இதைத்தொடர்ந்து சமீபத்தில் பேசிய அதிமுக நிர்வாகி இன்பதுரை, அதிமுக கூட்டணிக்கு விசிக இருக்கும் எனவும் நல்லவர்களுடன் திருமா இருப்பார் எனவும் தெரிவித்தார். இதற்கு பதில் அளித்த திருமாவளவன், இப்போது, எப்போது திமுக கூட்டணியில் விசிக தொடரும் என கூறினார். 2026 சட்டமன்ற தேர்தலில் விசிக எந்த கூட்டணியில் அங்கம் வகிக்கும் என்ற எதிர்பார்ப்பு எழுந்துள்ளது. இந்த நிலையில் உறுதியில்லா உதிரிகளா நமது எதிரிகள் என திருமாவளவன் தெரிவித்துள்ளார்.

இது குறித்து விசிக தலைவர் திருமாவளவன் தனது எக்ஸ் தளப்பக்கத்தில், களமிறங்கிச் செயல்படுவோர் யாவராயினும் அவர்கள் விமர்சனங்களுக்கு ஆளாவது தவிர்க்க இயலாதது. அதன்படியே கருத்தியல் தளங்களிலும் செயற்பாட்டுக் களங்களிலும் தொடர்ந்து மக்களோடு நின்று பாடாற்றிவரும் விசிக பல்வேறு விமர்சனங்களுக்கு ஆளாகி வருகிறது.விமர்சனங்கள் எவ்வாறாயினும் அவற்றை உள்வாங்கிக் கொள்ளும் பொறுமையையும் பின்னர் அவற்றினடிப்படையில் சுய விமர்சனம் செய்துகொள்கிற துணிவையும் பெறுவதுதான் வெற்றிகரமான அடுத்தகட்ட நகர்வுகளுக்கும் முற்போக்கான வளர்ச்சிக்கும் அடிப்படையாக அமையும். 

அப்படியே நாம், நம் மீதான
விமர்சனங்களையும் உள்வாங்கிக் கொண்டு, அவை நேர்மையான, ஆக்கபூர்வமான விமர்சனங்களாக இருந்தால், அவற்றிலிருந்து நம்மை நாமே சுய விமர்சனங்களுக்கு உட்படுத்திக் கொள்வதை நடைமுறையாகக் கொண்டிருக்கிறோம். அவற்றுக்கேற்ப தேவையான மாற்றங்களையும் ஏற்றுக் கொள்கிறோம்.ஆனால், நம்மைப் பற்றிய விமர்சனங்கள் எத்தகையவையாக உள்ளன? அவை, பெரும்பாலும் திட்டமிட்ட பொய்யுரைகளாகவும் ஆதாரமற்ற அவதூறுகளாகவுமே அள்ளி இறைக்கப்படுகின்றன. 

கடந்த முப்பத்தைந்து ஆண்டுகளாகவே நமது களப்பணிகள் மற்றும் வளர்ச்சி நிலைகளுக்கேற்ப, நமக்கு எதிரானவர்கள் விமர்சனங்கள் என்னும் பெயரால் மிகவும் அப்பட்டமான அவதூறுகளைத் தொடர்ந்து பரப்பி வருகின்றனர்.  அவை, மிகவும் கேடான உள்நோக்கம் கொண்டவை.

சமூகம், பண்பாடு, மற்றும் அரசியல் தளங்களில், நாம் கைக் கொண்டுள்ள கருத்தியல் மற்றும் நிலைப்பாடுகள், நமது களம் மற்றும் செயற்பாடுகள் ஆகியவற்றுக்கு எதிராக வெவ்வேறு வகையிலான பகைவர்கள் அவ்வப்போது உருவாகி வருகின்றனர். அவர்கள் நம்மை வீழ்த்துவதற்குக் கையாண்டுவரும் உத்திகள் ஏராளம். அவற்றுள் முதன்மையான ஒன்றுதான்  அவதூறு பரப்புதலாகும். விமர்சனம் என்பது வேறு! அவதூறு என்பது வேறு! 
விமர்சனம் என்பது ஒருவரின் அல்லது ஒரு இயக்கத்தின் கொள்கை கோட்பாடுகள் மற்றும் களப்பணிகள் ஆகியவற்றில் காணும் நிறை- குறைகளை மதிப்பீடு செய்வதாகும். குறைபாடுகளை மட்டுமே சுட்டிக்காட்டாமல் நிறைகளையும் வரவேற்றுப் பாராட்டுவதும்தான் விமர்சனமாகும். ஆனால், அவ்வாறின்றி வாய்க்கு வந்தபடி வன்மத்தைக் கக்குவது  விமர்சனமல்ல; அவதூறாகும்! நம்மை விமர்சிப்பவர்களில் இருவகை உண்டு. நம் மீது நம்பிக்கையும், நமது வளர்ச்சியில் அக்கறையும் கொண்டவர்கள் ஒருவகை.

நம்மை ஏற்க மனமில்லாத, நம் வளர்ச்சியை முற்றிலும் விரும்பாத, நம்மை வீழ்த்தி மகிழ்ந்தாட காத்திருக்கும் சதிகாரர்கள் இன்னொரு வகை. முதல் வகையினர், கொள்கை- கோட்பாடுகள் சார்ந்து குறைகளைச் சுட்டிக்காட்டினாலும், அதில் ஆக்கப்பூர்வமான அறிவுறுத்தல்கள் இருக்கும். அவர்களின் விமர்சனங்களில் கடுமையான காய்தல் இருந்தாலும் காயப்படுத்துதல் இருக்காது. அவற்றை உள்வாங்கிக் கொள்வதற்கும் சுயவிமர்சனம் செய்து நம்மை நாமே சீர்செய்து கொள்வதற்கும் அவை இடமளிக்கும்.ஆனால், இரண்டாம் வகையினர், கொள்கை சார்ந்து விமர்சிப்பதைவிட, வெறுப்பை உமிழ்வதிலேயே குறியாய் இருப்பர். அருவருப்பான சுடுசொற்களை அள்ளி வீசுவர். உணர்ச்சிகளைத் தூண்டி, உள்ளத்தைக் கீறி நம்மை நிலைகுலைய வைப்பதையே நோக்கமாகக் கொண்டிருப்பர். 

நாகரிகம் என்பது அவர்கள் அறியாத ஒன்று. அண்டப் புளுகுகளே அவர்களுக்கான தொழில் முதலீடு. நீதி, நேர்மை போன்ற அறம்சார் பண்புகளுக்கும் அவர்களுக்கும் தொடர்பிருக்காது. அவதூறு பரப்புதலே அவர்களின் சாதனைகள். அவர்கள் அமைப்புசாரா உதிரிகள். ஏதேனும் அமைப்பைச் சார்ந்திருந்தாலும் அவ்வமைப்புக்கு எவ்வகையிலும் கட்டுப்படாத தான்தோன்றிகள்.அவர்கள் தனிநபராயினும் அல்லது ஓர் அமைப்பைச் சார்ந்தவராயினும் அவர்களிடம் கருத்தியல் தெளிவில்லையேல்; களமாடும் திறமில்லையேல்; அவர்களால் எவரோடும் எதனோடும் இணைந்தோ இணங்கியோ இயங்கிட இயலாது.

இவர்கள்  தமக்குத்தாமே தனிமைப்பட்டு தற்பெருமைப் பேசி தம்பட்டமடிப்பதில் தனிசுகம் காண்பர். 'எடுத்தேன் கவிழ்த்தேன்' என ஏறுக்கு மாறாய் செயல்பட்டு இறுமாப்புக் கொள்வர். இடக்கு முடக்காய் இட்டுக்கட்டிப் பேசுவர். எடுப்பார் கைப்பிள்ளைகளாய் ஏவல்களைச் செய்வர். எளியோரை இகழ்ந்து ஏகடியம் பண்ணுவர்.  வலுத்தோரின் பார்வைக்கேற்ப வாலாட்டி மகிழ்வர். நிலைகெட்ட மாந்தர். நெறிகெட்ட வீணர். மக்களோடு தொடர்பில்லாத இவர்களா நம்மை மதிப்பீடு செய்வது? எவர் நம்மை விமர்சிப்பவர்கள் என்பதையறிந்தே நம் எதிர்வினைகள் அமையவேண்டும். 

கொண்ட கொள்கைக்கென தம் வாழ்வைத் தொலைத்தவர்கள்,  வலியைச் சுமப்பவர்கள், மக்களை நேசிக்கும் மாந்தநேயம் உள்ளவர்கள் செய்யும் விமர்சனங்களை நாம் புறம்தள்ள இயலாது. அவர்கள்  கொள்கை அடிப்படையில் நம் எதிரிகள் என்னும் நிலையில், அவர்களின் விமர்சனங்களுக்கு எதிர்வினையாற்றும் பொறுப்பு நமக்கு உண்டு. அது தவிர்க்கமுடியாதது. ஆனால், எதிலும் உறுதியில்லா உதிரிகளா நமது எதிரிகள்? ஆதாரம் ஏதுமின்றி இவர்கள் பரப்பும் அவதூறுகளா நம்மை அசைக்கும் ஆயுதங்கள் ? காழ்ப்புணர்வால் வன்மம் கக்குவோரைக் கண்டும் காணாமல் கடந்து செல்வோம்! காலமெல்லாம் மக்களுக்காகக் கடமையாற்றுவதில் கவனம் குவிப்போம்! ஆக்கபூர்வமான விமர்சனங்கள எதிர்கொள்வோம்! ஆதாரமில்லாத அவதூறுகளைப் புறம்தள்ளுவோம்!” என பதிவிட்டுள்ளார்.