Manjummel Boys: பாக்ஸ் ஆஃபீஸில் அதகளம் செய்த மஞ்சும்மல் பாய்ஸ்… மல்லுவுட்டில் உருவான 200 கோடி கிளப்

மலையாளத்தில், சிதம்பரம் இயக்கிய மஞ்சும்மல் பாய்ஸ் திரைப்படம், கடந்த மாதம் 22ம் தேதி ரிலீஸானது. செளபின் சாஹிர், ஸ்ரீநாத் பாஸி உள்ளிட்ட பலர் நடித்திருந்த இந்தப் படம், பெரிய அளவில் ப்ரோமோஷன்ஸ் ஏதும் இல்லாமலேயே ரிலீஸானது. ஆனால், படம் வெளியான முதல் வாரத்திலேயே பாசிட்டிவான விமர்சனங்கள் வர, அடுத்தடுத்த நாட்களில் மாஸ் காட்டியது.  

கொடைக்கானலின் குணா குகைக்கு டூர் சென்றிருந்த கேரள இளைஞர்களின் உண்மைச் சம்பவத்தை பின்னணியாக வைத்து, மஞ்சும்மல் பாய்ஸ் படத்தை இயக்கியிருந்தார் சிதம்பரம். உண்மைக்கு நெருக்கமான காட்சியமைப்புகள், சூப்பரான திரைக்கதை, அட்டகாசமான மேக்கிங், மிரட்டலான பிஜிஎம், கிளாஸிக்கலான சினிமாட்டோகிராபி என, ரசிகர்களை கிறங்க வைத்தது மஞ்சும்மல் பாய்ஸ்.  

முக்கியமாக, இதில் இடம்பெற்ற குணா படத்தின் ‘கண்மணி அன்போடு’ பாடல் மொழிகளை கடந்தும் ரசிகர்களை சிலிர்க்க வைத்தது. சொல்லப் போனால், கண்மணி அன்போடு பாடல் தான் மஞ்சும்மல் பாய்ஸின் பிரம்மாண்டமான வெற்றிக்கு காரணம் எனலாம். இதனால், தமிழ் ரசிகர்கள் இந்தப் படத்தை கொண்டாடித் தீர்த்தனர். இதனையடுத்து பாக்ஸ் ஆபிஸிலும் அதகளம் செய்தது மஞ்சும்மல் பாய்ஸ்.  

தமிழ்நாட்டில் மட்டும் 50 கோடிக்கும் அதிகமாக வசூலித்துள்ள மஞ்சும்மல் பாய்ஸ், ஒட்டுமொத்தமாக 200 கோடி ரூபாய் கலெக்‌ஷன் செய்து, இன்டஸ்ட்ரி ஹிட் அடித்துள்ளது. இதுதான் மலையாளத்தில் அதிக வசூல் என்பதும் குறிப்பிடத்தக்கது. மோகன்லாலின் புலி முருகன், 100 கோடி வசூலை கடந்த முதல் படம் என்ற சாதனை படைத்தது. அதேபோல், தற்போது 200 கோடி வசூல் செய்த முதல் மலையாள படம் என்ற சாதனை மஞ்சும்மல் பாய்ஸ்க்கு கிடைத்துள்ளது. இந்தப் படம் மொத்தமே 20 கோடிக்கும் குறைவான பட்ஜெட்டில் உருவாகியிருந்தது குறிப்பிடத்தக்கது.