'ஜனநாயகன்' விமர்சனம்: விஜயின் திரைப்பயணத்திற்கு பக்காவான FAREWELL..!
விஜய் நடித்துள்ள ஜனநாயகன், பகவந்த் கேசரி படத்தைத் தழுவியிருந்தாலும், தமிழுக்கேற்ற மாற்றங்கள் மற்றும் H. வினோத்தின் அரசியல் அணுகுமுறையால் தனித்துவமான கமர்ஷியல் படமாக உருவாகியுள்ளது.
தமிழ் சினிமாவில் மிகுந்த எதிர்பார்ப்புக்கு மத்தியில் வெளியாகியுள்ள 'ஜனநாயகன்', தெலுங்கில் அனில் ரவிபுடி இயக்கத்தில் பாலகிருஷ்ணா நடித்த 'பகவந்த் கேசரி' திரைப்படத்தை தழுவி உருவாக்கப்பட்டுள்ளது. இருப்பினும், தமிழுக்கேற்ற வகையில் பல மாற்றங்கள் செய்யப்பட்டுள்ளதால், இது வெறும் ரீமேக் என்ற உணர்வை முழுமையாக ஏற்படுத்துவதில்லை.
குறிப்பாக, தெலுங்கு பதிப்பில் இடம்பெற்ற வில்லன் கதாபாத்திரத்தில் மாற்றம் செய்து, ஒற்றுமை மற்றும் அரசியல் சார்ந்த கருத்துகளை இயக்குநர் H. வினோத் தனது பாணியில் இணைத்துள்ளார். அதேநேரத்தில், நடிகர் விஜயின் கடைசி திரைப்படம் என்பதால், அவரது ரசிகர்களை திருப்திப்படுத்தும் வகையில் பல மாஸ் தருணங்கள், ரசிகர்கள் கொண்டாடும் வசனங்கள் மற்றும் காட்சிகள் படம் முழுவதும் இடம்பெற்றுள்ளன.
விஜயின் Aura-விலேயே நகரும் படம்
படத்தின் தொடக்கம் முதல் இறுதி வரை விஜயின் ஸ்கிரீன் பிரசன்ஸ்தான் படத்தின் மிகப்பெரிய பலமாக அமைகிறது. அவரது நடிப்பு, மாஸ் நடை, வசன உச்சரிப்பு, ஆக்ஷன் என அனைத்திலும் ரசிகர்கள் எதிர்பார்த்த விஜயை முழுமையாக காண முடிகிறது. குறிப்பாக உணர்ச்சிகரமான காட்சிகளிலும், மாஸ் தருணங்களிலும் அவர் ரசிகர்களின் கைதட்டலை அள்ளுகிறார்.
மாமிதா பைஜு – உணர்வுப்பூர்வமான நடிப்பால் கவர்கிறார்
விஜயின் மகளாக நடித்துள்ள மாமிதா பைஜு, தனது கதாபாத்திரத்திற்கு முழு நியாயம் செய்திருக்கிறார். எமோஷனல் காட்சிகள், ஆக்ஷன் தருணங்கள், தந்தை–மகள் உறவை வெளிப்படுத்தும் காட்சிகள் என அனைத்திலும் சிறப்பான நடிப்பை வெளிப்படுத்தியுள்ளார். படத்தின் உணர்ச்சிப்பூர்வமான மையமாக அவரது கதாபாத்திரம் அமைகிறது.
பூஜா ஹெக்டேவுக்கு குறைவான முக்கியத்துவம்
விஜய்க்கு ஜோடியாக நடித்துள்ள பூஜா ஹெக்டே, கதையின் மையக் கதாபாத்திரமாக இல்லாவிட்டாலும், தனக்குக் கொடுக்கப்பட்ட வேலையை இயல்பாக செய்திருக்கிறார். அவருக்கான காட்சிகள் குறைவாக இருந்தாலும், கதையின் ஓட்டத்திற்கு தேவையான அளவுக்கு அவரது பங்களிப்பு உள்ளது.
பாபி தியோல் மற்றும் பிரகாஷ் ராஜ் – வலுவான எதிரணிகள்
முக்கிய வில்லனாக வரும் பாபி தியோல், தனது மிரட்டலான தோற்றம் மற்றும் நடிப்பால் கவனம் ஈர்க்கிறார். அவர் ஏன் வில்லனாக மாறுகிறார் என்பதற்கான பின்னணி நம்பும்படியாக அமைக்கப்பட்டுள்ளது.
மற்றொரு புறம், பிரகாஷ் ராஜ் துணை வில்லனாக தனது அனுபவத்தை வெளிப்படுத்துகிறார். ரசிகர்களிடம் வெறுப்பை ஏற்படுத்த வேண்டிய இடங்களில் அதைச் சரியாக செய்திருப்பதால், ஹீரோவின் வெற்றியும் மேலும் உயர்ந்து தெரிகிறது.
மற்ற நடிகர்களின் பங்களிப்பு
ரேவதி மற்றும் டி.ஜே. அருணாச்சலம் ஆகியோருக்கு அதிக காட்சிகள் இல்லாவிட்டாலும், அவர்களுக்கு வழங்கப்பட்ட கதாபாத்திரங்களை சிறப்பாக செய்திருக்கிறார்கள்.
'தாய் கிழவி' இரண்டு இட்லி முத்துக்குமார், போலீஸ் கதாபாத்திரத்தில் சில இடங்களில் நகைச்சுவையால் ரசிகர்களை சிரிக்க வைக்கிறார்.
ரசிகர்களை ஆச்சரியப்படுத்தும் கேமியோ
படம் இணையத்தில் கசிந்ததால் பலர் முன்கூட்டியே பார்த்திருந்தாலும், அந்த லீக் பதிப்பில் இடம்பெறாத ஒரு சிறப்பு கேமியோ, திரையரங்கில் வெளியாகியுள்ள அதிகாரப்பூர்வ பதிப்பில் இடம்பெற்றுள்ளது. அந்த தருணம் ரசிகர்களுக்கு இனிமையான ஆச்சரியத்தை அளிக்கிறது.
'Good Touch – Bad Touch' காட்சி
'பகவந்த் கேசரி' படத்தில் பெரிதும் பேசப்பட்ட Good Touch – Bad Touch காட்சி, தமிழிலும் இடம்பெற்றுள்ளது. ஆனால் அந்த வசனத்தை விஜய் தனது தனித்துவமான பாணியில் பேசியிருப்பதால், அதன் தாக்கம் மேலும் அதிகரிக்கிறது. சமூக விழிப்புணர்வை ஏற்படுத்தும் முக்கியமான காட்சியாக இது அமைந்துள்ளது.
தொழில்நுட்ப ரீதியாக பிரம்மாண்டம்
ஒரே இடத்தில் 48 பிரம்மாண்ட செட்களை அமைத்து படமாக்கியுள்ள கலை இயக்குநர் செல்வகுமார் தனது உழைப்பால் ஆச்சரியப்படுத்துகிறார்.
ஒளிப்பதிவாளர் சத்யன் சூரியன், ஒவ்வொரு காட்சியையும் பிரம்மாண்டமாக காட்சிப்படுத்தியுள்ளார். குறிப்பாக ஆக்ஷன் மற்றும் உணர்ச்சிகரமான காட்சிகளில் அவரது ஒளிப்பதிவு தனித்து நிற்கிறது.
இரண்டாம் பாதியில் இடம்பெறும் CGI மற்றும் VFX காட்சிகளும் தரமான முறையில் வடிவமைக்கப்பட்டுள்ளதால், பெரிய அளவிலான காட்சிகள் திரையில் சிறப்பாக வேலை செய்கின்றன.
அனிருத் – படத்தின் இன்னொரு பலம்
சில இடங்களில் திரைக்கதை சற்று மந்தமாக நகர்ந்தாலும், அனிருத்தின் பின்னணி இசை அந்த வேகத்தை மீட்டெடுக்கிறது. குறிப்பாக மாஸ் காட்சிகளில் அவரது BGM ரசிகர்களை உற்சாகப்படுத்துகிறது. பாடல்களும் பின்னணி இசையும் திரையரங்கில் கொண்டாட்ட மனநிலையை உருவாக்குகின்றன.
படத்தின் குறைகள்
சில இடங்களில் ஹீரோ பில்ட்அப் வசனங்கள் சற்று செயற்கையாக இருப்பது போன்ற உணர்வு ஏற்படுகிறது. சண்டைக் காட்சிகளில் அதிகப்படியான ஸ்லோ மோஷன் பயன்படுத்தப்பட்டிருப்பதால், சில காட்சிகளின் இயல்புத்தன்மை குறைகிறது. மேலும், முதல் பாதியில் திரைக்கதை சற்று மெதுவாக நகர்வதும் படத்தின் முக்கிய குறையாக தெரிகிறது.
இறுதித் தீர்ப்பு
'ஜனநாயகன்' முழுமையான புதிய கதையை சொல்லாவிட்டாலும், தமிழுக்கேற்ற மாற்றங்கள், H. வினோத்தின் திரைக்கதை அணுகுமுறை, விஜயின் மாஸ் ஸ்கிரீன் பிரசன்ஸ், மாமிதா பைஜுவின் உணர்ச்சிகரமான நடிப்பு மற்றும் அனிருத்தின் பின்னணி இசை ஆகியவை படத்தை சுவாரஸ்யமான கமர்ஷியல் அனுபவமாக மாற்றுகின்றன.
விஜய் ரசிகர்களுக்கு இது ஒரு முழுமையான கொண்டாட்ட விருந்து.
பொதுவான ரசிகர்களுக்கு நல்ல கமர்ஷியல் என்டர்டெய்னராக அமைகிறது.
நடுநிலையான பார்வையாளர்களுக்கு, சில குறைகள் இருந்தாலும், Above Average அனுபவத்தை வழங்கும் திரைப்படமாக 'ஜனநாயகன்' அமைந்துள்ளது.
மதிப்பீடு: 3.25/5
– வே. நாகதீபக்
What's Your Reaction?
