“அதிமுக ஆட்சியில் லேப்டாப்... திமுக ஆட்சியில் கஞ்சா...”-செல்லூர் ராஜு தாக்கு 

அதிமுக ஆட்சியில் மாணவர்களுக்கு சைக்கிள், மடிக்கணினி கொடுத்தோம். ஆனால், திமுக ஆட்சியில் பீர், கஞ்சா ஆகியவற்றை மாணவர்களுக்கு சப்ளை செய்கிறது என முன்னாள் அமைச்சர் செல்லூர் ராஜு  தெரிவித்துள்ளார்.

மதுரை விளாங்குடி பகுதியில் அதிமுக 53 வது ஆண்டு தொடக்கத்தை முன்னிட்டு 53 அடி உயர கழகக் கூடிய ஏற்றும் நிகழ்ச்சி நடைபெற்றது. காவல்துறை சார்பில் கொடி மரத்திற்கு அனுமதி அளிக்காத நிலையில் ஏற்கனவே உள்ள 25 அடி உயர கொடிக்கம்பத்தில் அதிமுக கொடி ஏற்றி நிகழ்ச்சி தொடங்கி வைக்கப்பட்டது.

இதனைத் தொடர்ந்து செய்தியாளர்களை சந்தித்து பேசிய முன்னாள் அமைச்சர் செல்லூர் ராஜு,  “53 அடி உயர கட்சி கொடியை ஏற்ற காவல்துறையின் அனுமதி கேட்டபோது அனுமதி மறுத்தது. அத்துமீறி கொடியேற்றினால் கைது செய்யப்படுவீர்கள் என காவல்துறையினர் கூறினாலும், அதிமுக இதற்கெல்லாம் அஞ்சாது. 53 அடி உயர கொடி ஏற்றுவதான் மூலம் என்ன ஆக போகிறது. மதுரையில் நேற்றைய தினம் சாலையில் நடந்து சென்ற இளம்பெண்ணை பாலியல் சீண்டலில் ஈடுபட்டு செல்கிறான். வகுப்பறையில் பெண் ஆசிரியர் படுகொலை செய்யப்படுகிறார். நீதிமன்ற வாசலில் வழக்கறிஞர் வெட்டப்படுகிறார். தமிழக காவல்துறை இன்றைக்கு சந்தி சிரிக்கிறது. தமிழகத்தில் சட்டம்-ஒழுங்கு சீர்கெட்டு உள்ளது என நீதிபதிகள் இன்றைக்கு ஒவ்வொரு முறையும் திமுக அரசிற்கு கொட்டு வைக்கிறார்கள்.

கள்ளச்சாராயம் விவகாரத்தில் உயர்நீதிமன்ற நீதிபதிகள் சிபிஐ விசாரணை தேவை என கூறி இருக்கிறது. SP அலுவலகம் அருகே உள்ளபோது கள்ளச்சாராயம் விற்பனை நடைபெற்றது குறித்து நீதிபதிகள் கேள்வி எழுப்பி வருகின்றனர்.ஆர்.எஸ்.பாரதி கூறுவதுபோல திமுக அரசு குறித்து எந்த நீதிபதியும் பாராட்டவில்லை. தேர்தலுக்கு இன்னும் ஒன்றரை ஆண்டுகள் உள்ளது. நம் மக்களிடம் எப்படி சந்தித்து ஓட்டு கேட்பது என திமுகவினர் குழம்பி போய் இருக்கிறார்கள். அந்த அளவிற்கு விலைவாசி, உயர்வு சட்ட ஒழுங்கு சீர்கேடு தமிழகத்தில் நிலைவி வருகிறது.

தமிழகத்தில் இந்த ஆட்சி வந்ததிலிருந்து தமிழகத்திற்கு விடியலே இல்லை. இந்த ஆட்சியை உடனடியாக வீட்டுக்கு அனுப்ப வேண்டும்.அதற்கான பணியை எடப்பாடி பழனிசாமி கையில் எடுப்பார் என்றார். அதிமுக ஆட்சியில் கள்ளச்சாராயம் குறித்து உயிரிழப்பு அதிகரித்ததா.? மோசமான சட்ட ஒழுங்கு சீர்கெட்டு இருந்ததா.? ஆர்.எஸ்.பாரதி அண்ணே ஊருக்காக எல்லாம் சொல்லாதீங்க., உண்மைய ஊருக்கு சொல்லுங்க அண்ணே. (அவருக்கே உரிய பாணிகள் கிண்டலாக பேசினார்.) திமுக அரசு குறித்து அவர் பேச வேண்டும் என்று ஆர்.எஸ்.பாரதி பேசி வருகிறார். 

கஸ்தூரி ஒரு திரைப்பட நடிகை, அவரது மகன் 12 வயது மகன் ஆட்டிசம் குறைபாடு உள்ளவர். அவரது மகனை அவர்தான் பாதுகாக்க வேண்டும். மேலும், திமுகவினர் பேசாத பேச்சா கஸ்தூரி பேசியிருக்கிறார். கஸ்தூரியை பிடிப்பதற்கு காவல்துறையினர் இரண்டு தனிப்படை அமைத்து அவரை ஆந்திராவில் பிடித்திருக்கிறது என்கிறார். ஆனால், செந்தில் பாலாஜி பிடித்து சிறையில் ஓர் ஆண்டு காலம் இருந்தாலும் அவரது தம்பியை இதுவரை தமிழக காவல்துறையினர் பிடிக்கவில்லையே.?

சமூக வலைதளத்தில் ஆயிரம் சொல்லுவார்கள்.?  விஜயுடன் கூட்டணி என எங்கள் பொதுச் செயலாளர் கூட்டணி தெரிவித்தாரா.? அல்லது விஜய் கூட்டணி குறித்து அறிவித்தாரா.? ஒரு இளைஞர் கட்சியை தொடங்குகிறார் அதற்கு நாங்கள் அவரை வரவேற்றோம். சகோதரர் திருமாவளவன் போர்குணம் மிக்கவர்., சமீப காலமாக திமுகவுடன் கூட்டணி காரணமாக அழுத்தத்தின் காரணமாக இதுபோன்று திருமாவளவன் பேசுகிறார்.

கட்சி நிர்வாகிகள் பொதுக்கூட்டத்தில் ஆயிரம் பேசுவார்கள். நான் கூட பேசாததை பேசியதாக தனியார் தொலைக்காட்சி நிறுவனம் கூட நான் பேசியதாக வெளியிட்டுள்ளது. இது அதிமுக கட்சிப்பா..! நான்தான் என்று எந்த அதிமுக தொண்டனும் சொல்ல மாட்டான். இது குறித்து அவதூறு பரப்பப்படுகிறது என்றார்.கழகக் கொடியேற்றுங்கள் பணிக்குழு அமைத்து தேர்தலுக்கான பணிகளை தொடங்க பொதுச் செயலாளர் உத்தரவிட்டு அதற்கான பணிகளும் நடைபெற்று வருகிறது. 2026 தேர்தலுக்கு அதிமுக தேர்தல் பணிகளை ஏற்கனவே தொடங்கி விட்டோம் என்றார்.

எங்களது ஆட்சியில் பள்ளி மாணவர்களுக்கு சைக்கிள், மடிக்கணினி ஆகியவற்றை கொடுத்தோம். ஆனால், இன்றைக்கு திமுக ஆட்சியில் பீர், கஞ்சா ஆகியவற்றை பள்ளி மாணவர்களுக்கு சப்ளை செய்கிறது என்றார். மேலும், 53 அடி உயர கழகக் கொடியை ஏற்ற இருந்த நிலையில், காவல்துறையினர் அனுமதி மறுத்ததால் 25 அடி உயரத்தில் கழகக் கொடியை ஏற்றி வேதனையில் இருக்கிறோம் என்றார்.