"தெர்மாகோலுக்கே கிண்டல் பண்ணீங்களே"..இப்போ “சோப், ஷாம்பு”வச்சிருக்கீங்களே..வெளுத்து வாங்கிய செல்லூர் ராஜூ!

வடகிழக்குப் பருவமழை காரணமாகத் திருப்பூர் மாவட்டத்தில் நொய்யல் ஆற்றில் வெள்ளப்பெருக்கு ஏற்பட்டுள்ளது. வெள்ளநீருடன் அதிகளவில் நுரை பொங்கி வருவது அப்பகுதியில் கவனத்தைப் பெற்றுள்ளது. ஆலைகளில் இருந்து வெளியேறும் ரசாயனக் கழிவுநீர் ஆற்றில் கலப்பதால் இந்த நிலை ஏற்பட்டுள்ளதாகச் சூழலியல் ஆர்வலர்களும் விவசாயிகளும் குற்றம்சாட்டி வருகின்றனர். 

இதற்கிடையே, பொதுமக்கள் பயன்படுத்தும் சோப்பு மற்றும் ஷாம்புவும் நுரை ஏற்படுவதற்குக் காரணமாக இருக்கலாம் என்று தவெகவின் அமைச்சர் ராஜீவ் தெரிவித்ததாகக் கூறப்படும் கருத்து விவாதத்தை ஏற்படுத்தியுள்ளது.

‘அமைச்சருக்கு நோபல் பரிசு கொடுக்க வேண்டும்!’

இது தொடர்பாக மதுரையில் அதிமுக முன்னாள் அமைச்சர் செல்லூர் ராஜூவிடம் செய்தியாளர்கள் கேள்வி எழுப்பினர். அதற்குப் பதிலளித்த அவர், “உலகமே வியக்கும் வகையில் ஒரு புதிய கண்டுபிடிப்பை அமைச்சர் வெளியிட்டுள்ளார். 

அவருக்கு நோபல் பரிசுதான் கொடுக்க வேண்டும். உலக மக்கள் அனைவரும் குளிப்பதற்குப் பயன்படுத்தும் சோப், ஷாம்புவினால்தான் ஆற்றில் நுரை வருகிறது என்று ஒரு அமைச்சர் சொல்கிறார். இந்த நாட்டில் எப்படிப்பட்டவர்களையெல்லாம் பார்க்க வேண்டியுள்ளது!” என்று விமர்சித்தார்.

தான் அமைச்சராக இருந்தபோது ‘எகிப்து’ என்பதற்குப் பதிலாக ‘ஈஜிப்ட்’ என்று கூறியதற்காகச் சமூக வலைதளங்களில் கேலி செய்யப்பட்டதைச் சுட்டிக்காட்டிய அவர், தற்போது அமைச்சர் தெரிவித்துள்ள கருத்தையும் இணையவாசிகள் விமர்சிப்பார்களா எனக் கேள்வி எழுப்பினார்.

மேலும், தான் அமைச்சராக இருந்தபோது தெர்மாகோல் மூலம் தண்ணீரைச் சேமிக்கும் முயற்சி குறித்தும் விமர்சனங்கள் எழுந்ததாகக் குறிப்பிட்ட செல்லூர் ராஜூ, “அதிகாரிகள் கூறியதன் அடிப்படையில்தான் தெர்மாகோல் முயற்சியை மேற்கொண்டோம். அதையும் கிண்டல் செய்து வைரலாக்கினார்கள். இப்போது யாராவது அந்த அமைச்சரைக் கேள்வி கேட்கிறீர்களா?” என்று கேள்வி எழுப்பினார்.

விஜய், தனுஷ் உள்ளிட்ட நடிகர்கள் குறித்துப் பேசிய செல்லூர் ராஜூ

தொடர்ந்து நடிகர்கள் அரசியலுக்கு வருவது குறித்துப் பேசிய செல்லூர் ராஜூ, தற்போதைய நடிகர்களை எம்.ஜி.ஆருடன் ஒப்பிட முடியாது என்று தெரிவித்தார்.

“இன்றைய தேதியில் நடிகர்களின் அரசியல் வருகை அதிகமாக இருப்பதுபோலத் தெரிந்தாலும், அவர்களை எல்லாம் எம்.ஜி.ஆர் அளவுக்குச் சொல்ல முடியுமா? எம்.ஜி.ஆரின் கால் தூசிக்குக்கூட ஈடாக மாட்டார்கள். இந்த நாட்டில் ஒரே ஒரு புரட்சித் தலைவர்தான் உருவாக முடியும். 

இனிமேல் அவரைப் போல யாரும் பிறக்கப்போவதும் இல்லை, அவரைப் போல ஆகப்போவதும் இல்லை” என்று அவர் கூறினார்.
மேலும், ஜனநாயக நாட்டில் யார் வேண்டுமானாலும் அரசியல் கட்சி தொடங்கலாம் என்றும், நடிகர்கள் தனுஷ், விஜய் சேதுபதி, சிவகார்த்திகேயன் உள்ளிட்டோர் அரசியலுக்கு வந்தால் அதில் தவறில்லை என்றும் தெரிவித்தார்.

தமிழக வெற்றிக் கழகத் தலைவர் விஜய்யின் அரசியல் வருகை குறித்துப் பேசிய அவர், மற்ற நடிகர்களும் அரசியலுக்கு வந்தால் தங்களது தலைவரும் ஒரு நடிகராகவே பார்க்கப்படுவாரோ என்ற அச்சம் தவெக தொண்டர்களுக்கு இருப்பதாகத் தனது கருத்தை முன்வைத்தார்.

‘விமர்சனங்களை மறைக்கவே கைது நடவடிக்கைகள்’

தமிழ்நாடு அரசின் செயல்பாடுகள் குறித்துப் பேசிய செல்லூர் ராஜூ, கடந்த ஆறு மாதங்களில் ஆட்சியின் மீது பல்வேறு விமர்சனங்கள் எழுந்துள்ளதாகக் கூறினார். அந்த விமர்சனங்களை மறைப்பதற்காகவே கைது நடவடிக்கைகள் மேற்கொள்ளப்படுவதாக அவர் குற்றம்சாட்டினார். “இந்த அரசாங்கம் தன் மீதான விமர்சனங்களை மறைக்க அடக்குமுறையை ஏவப் பார்க்கிறது” என்றும் அவர் விமர்சித்தார்.

நொய்யல் ஆற்றில் நுரை பொங்குவதற்கான காரணம் தொடர்பாகச் சுற்றுச்சூழல் ஆர்வலர்கள் முன்வைக்கும் ரசாயனக் கழிவுநீர் மாசு குறித்த குற்றச்சாட்டுகளும், அமைச்சர் ராஜீவ் தெரிவித்ததாகக் கூறப்படும் விளக்கமும் விவாதத்தை ஏற்படுத்தியுள்ள நிலையில், செல்லூர் ராஜூவின் இந்தக் கருத்துகள் அரசியல் வட்டாரத்தில் கவனம் பெற்றுள்ளன.