அமைச்சராகும் சௌமியா அன்புமணி? இடைத்தேர்தலுக்குப் பிறகு நடக்கப்போகும் ட்விஸ்ட்!

தவெக ஆட்சி... 4 மாதங்கள் கடந்த நிலையில் பரபரப்பு!

2026ஆம் ஆண்டு நடைபெற்ற தமிழ்நாடு சட்டமன்றத் தேர்தலில், புதிதாக கட்சி தொடங்கிய தமிழக வெற்றிக் கழகம் ஆட்சியைப் பிடித்தது. இதையடுத்து அக்கட்சியின் தலைவர் விஜய் முதலமைச்சராக பதவியேற்றார்.

தற்போது தவெக அரசு பொறுப்பேற்று நான்கு மாதங்களுக்கு மேலாகியுள்ள நிலையில், அரசின் செயல்பாடுகள் குறித்து அரசியல் கட்சிகள் மத்தியில் பல்வேறு விமர்சனங்களும், ஆதரவான கருத்துகளும் தொடர்ந்து முன்வைக்கப்பட்டு வருகின்றன. இதற்கிடையே, ஆளும் தவெகவை எதிர்கொள்ளும் வகையில் எதிர்க்கட்சிகளும் தங்களது அரசியல் நடவடிக்கைகளை தீவிரப்படுத்தி வருகின்றன.

தேர்தல் தோல்வி... அதிமுகவில் அடுத்தடுத்து அதிர்ச்சி!

2026 சட்டமன்றத் தேர்தலில் அதிமுக எதிர்பார்த்த வெற்றியைப் பெறாத நிலையில், அக்கட்சிக்குள் பல்வேறு அரசியல் சலசலப்புகள் ஏற்பட்டன. குறிப்பாக, கட்சியின் எதிர்காலம், தலைமைத்துவம் மற்றும் தேர்தல் தோல்விக்கான காரணங்கள் தொடர்பாக கட்சிக்குள் பல்வேறு கருத்துகள் முன்வைக்கப்பட்டதாக தகவல்கள் வெளியாகின.

இந்த சூழலில், அதிமுகவைச் சேர்ந்த சில முன்னாள் அமைச்சர்கள் மற்றும் எம்.எல்.ஏக்கள் தங்களது பதவிகளை ராஜினாமா செய்து தவெகவில் இணைந்தனர்.

அதிமுகவில் இருந்து...  பனையூருக்கும் படையெடுத்த இலை நிர்வாகிகள்!

அந்த வகையில், முன்னாள் அமைச்சர்கள் கே.ஏ. செங்கோட்டையன், சி. விஜயபாஸ்கர், எம்.ஆர். விஜயபாஸ்கர், இசக்கி சுப்பையா உள்ளிட்டோரும், முன்னாள் எம்.எல்.ஏக்களான மரகதம் குமரவேல், எஸ். ஜெயக்குமார், பி. சத்யபாமா உள்ளிட்டோரும் தவெகவில் இணைந்தனர்.

இந்த அரசியல் நகர்வு தமிழ்நாடு அரசியல் களத்தில் பெரும் பரபரப்பை ஏற்படுத்தியது. குறிப்பாக, மதுராந்தகம் மற்றும் தாராபுரம் தொகுதிகளில் அதிமுக சார்பில் வெற்றி பெற்ற மரகதம் குமரவேல் மற்றும் பி. சத்யபாமா ஆகியோர் தங்களது எம்.எல்.ஏ பதவிகளை ராஜினாமா செய்து தவெகவில் இணைந்தனர். இதன் காரணமாக அந்த இரண்டு தொகுதிகளும் காலியானதாக அறிவிக்கப்பட்டு இடைத்தேர்தல் நடத்தும் சூழல் உருவானது.

2 தொகுதிகளில்... அக்டோபர் 6-ல் இடைத்தேர்தல்!

மதுராந்தகம் மற்றும் தாராபுரம் ஆகிய இரண்டு தனித்தொகுதிகளுக்கும் அக்டோபர் 6ஆம் தேதி இடைத்தேர்தல் நடைபெறுகிறது. இரு தொகுதிகளும் தனித்தொகுதிகள் என்பதால், இந்த தேர்தல் அரசியல் ரீதியாகவும் முக்கியத்துவம் பெற்றுள்ளது.

வேட்புமனு தாக்கல் முடிவடைந்து, வாபஸ் பெறும் காலக்கெடுவும் நிறைவடைந்த நிலையில், மதுராந்தகத்தில் 27 பேரும், தாராபுரத்தில் 22 பேரும் என மொத்தம் 49 வேட்பாளர்கள் களத்தில் உள்ளனர்.

மதுராந்தகம்... மீண்டும் களத்தில் மரகதம்!

மதுராந்தகம் தொகுதியில் ஆளும் தவெக சார்பில் மரகதம் குமரவேல் போட்டியிடுகிறார். இவர் 2026 சட்டமன்றத் தேர்தலில் இதே தொகுதியில் அதிமுக சார்பில் போட்டியிட்டு வெற்றி பெற்றவர். பின்னர் எம்.எல்.ஏ பதவியை ராஜினாமா செய்து தவெகவில் இணைந்தார். தற்போது அதே தொகுதியில் தவெக வேட்பாளராக மீண்டும் களமிறங்கியுள்ளார்.

திமுக சார்பில் பரந்தாமனும், அதிமுக சார்பில் கணிதா சம்பத்தும் போட்டியிடுகின்றனர். மார்க்சிஸ்ட் கம்யூனிஸ்ட் கட்சி சார்பில் சுகந்தியும் களத்தில் உள்ளார்.

தாராபுரம்... மீண்டும் சத்தியபாமா!

தாராபுரம் தொகுதியிலும் இதே போன்ற அரசியல் சூழல் நிலவுகிறது. 2026 சட்டமன்றத் தேர்தலில் அதிமுக சார்பில் வெற்றி பெற்ற பி. சத்யபாமா, பின்னர் தனது எம்.எல்.ஏ பதவியை ராஜினாமா செய்து தவெகவில் இணைந்தார். தற்போது நடைபெறும் இடைத்தேர்தலில் தவெக சார்பில் மீண்டும் சத்யபாமா போட்டியிடுகிறார்.

திமுக சார்பில் சுகன்யாவும், அதிமுக சார்பில் கே. பானுமதியும் களத்தில் உள்ளனர். இந்திய கம்யூனிஸ்ட் கட்சி சார்பில் லட்சுமணனும் போட்டியிடுகிறார்.

ஒரே தொகுதி... வேட்பாளர்களும் பழைய போட்டியாளர்களும்!

மதுராந்தகம் மற்றும் தாராபுரம் இடைத்தேர்தலின் முக்கிய அரசியல் அம்சங்களில் ஒன்று, ஏற்கனவே அதிமுக சார்பில் வெற்றி பெற்றவர்களே தற்போது தவெக சார்பில் மீண்டும் களமிறங்கியிருப்பது.

இதனால், இந்த தேர்தல் வெறும் இடைத்தேர்தலாக மட்டுமல்லாமல், அதிமுகவில் இருந்து விலகி தவெகவில் இணைந்தவர்களின் அரசியல் நிலைப்பாட்டுக்கு கிடைக்கும் மக்கள் ஆதரவை அளவிடும் தேர்தலாகவும் அரசியல் வட்டாரங்களில் பார்க்கப்படுகிறது.

பாமக... யாருக்கும் ஆதரவு இல்லை!

இந்த பரபரப்பான சூழலில், பாமகவின் நிலைப்பாடு தேர்தல் களத்தில் முக்கிய விவாதமாக மாறியது. மதுராந்தகம் மற்றும் தாராபுரம் இடைத்தேர்தலில் எந்தக் கட்சிக்கும் ஆதரவு அளிக்கப்போவதில்லை என்று பாமக தலைவர் அன்புமணி ராமதாஸ் அறிவித்துள்ளார்.

கட்சியின் மாநில நிர்வாகிகள் மற்றும் இரு தொகுதிகளைச் சேர்ந்த மாவட்ட நிர்வாகிகளுடன் ஆலோசனை நடத்திய பின்னர் இந்த முடிவு எடுக்கப்பட்டதாக அன்புமணி தெரிவித்துள்ளார்.

அதிமுகவுக்கு ஏமாற்றமா?

2026 சட்டமன்றத் தேர்தலில் அதிமுக கூட்டணியில் பாமக இடம்பெற்றிருந்தது. இந்நிலையில், இடைத்தேர்தலில் பாமக தங்களுக்கு ஆதரவு அளிக்கும் என அதிமுக தரப்பில் எதிர்பார்ப்பு இருந்ததாக செய்திகள் வெளியாகின. ஆனால், தற்போது யாருக்கும் ஆதரவு இல்லை என அன்புமணி அறிவித்திருப்பது அதிமுகவுக்கு பின்னடைவாக பார்க்கப்படுவதாக அரசியல் ஆய்வுகள் தெரிவிக்கின்றன.

குறிப்பாக, மதுராந்தகம் பகுதியில் பாமகவுக்கு கணிசமான ஆதரவு இருப்பதாக செய்திகள் கூறப்படும் நிலையில், அந்தக் கட்சியின் நடுநிலை முடிவு தேர்தல் களத்தில் கவனம் பெற்றுள்ளது.

பாமக அடுத்து என்ன செய்யப்போகிறது?

பாமக எந்தக் கட்சிக்கும் ஆதரவு அளிக்காமல் இடைத்தேர்தலில் நடுநிலை வகிப்பதாக அறிவித்துள்ள நிலையில், அடுத்ததாக அக்கட்சியின் கூட்டணி நிலைப்பாடு என்ன என்பது குறித்து அரசியல் வட்டாரங்களில் விவாதம் தொடங்கியுள்ளது.

குறிப்பாக, 2026 சட்டமன்றத் தேர்தலுக்குப் பிறகு தமிழ்நாடு அரசியலில் புதிய கூட்டணி அமைப்புகள் உருவாகியுள்ள நிலையில், பாமகவும் தனது கூட்டணி வியூகத்தை மறுபரிசீலனை செய்யக்கூடும் என சில அரசியல் வட்டாரங்கள் தெரிவிக்கின்றன.

தவெக கூட்டணியில் பாமக?

இதற்கிடையே, பாமக தவெக தலைமையிலான கூட்டணியில் இணைய வாய்ப்பு இருப்பதாக தகவல்கள் வெளியாகியுள்ளன. தற்போது இது அதிகாரப்பூர்வமாக அறிவிக்கப்படாத நிலையில், பாமக–தவெக இடையே அரசியல் நெருக்கம் குறித்து பல்வேறு பேச்சுகள் எழுந்துள்ளன.

தவெக அரசு சாதிவாரி கணக்கெடுப்பு தொடர்பாக எடுத்துள்ள நடவடிக்கை உள்ளிட்ட சில விவகாரங்கள் பாமக நிர்வாகிகள் மத்தியில் வரவேற்பைப் பெற்றுள்ளதாகவும் சில ஊடகச் செய்திகள் குறிப்பிட்டுள்ளன.

சௌமியா அன்புமணிக்கு அமைச்சர் பதவியா?

மேலும், பாமக தவெக கூட்டணியில் இணைந்தால், சௌமியா அன்புமணிக்கு பெண்கள் நலன் சார்ந்த துறை வழங்குவது குறித்து பேச்சுவார்த்தை நடைபெறுவதாகவும் சில தகவல்கள் வெளியாகியுள்ளன.

சௌமியா அன்புமணிக்கு அமைச்சர் பதவி வழங்குவது அல்லது பாமக–தவெக கூட்டணி இது இடைத்தேர்தலுக்கு பிறகு தமிழ்நாட்டு அரசியலில் புதிய களம் மாறுவதற்கு வாய்ப்புள்ளதாகவும்  அரசியல் வட்டாரங்களில் பேசப்பட்டு வருகின்றன.

இடைத்தேர்தலுக்கு பிறகு... புதிய கூட்டணி கணக்கா?

மதுராந்தகம் மற்றும் தாராபுரம் இடைத்தேர்தல் முடிவுகள் தமிழ்நாடு அரசியலில் புதிய கூட்டணி கணக்குகளுக்கு வழிவகுக்குமா என்ற கேள்வியும் எழுந்துள்ளது.

தற்போதைய நிலையில், தவெக தலைமையிலான அணியில் காங்கிரஸ், விசிக, இந்திய யூனியன் முஸ்லிம் லீக், மதிமுக உள்ளிட்ட கட்சிகள் இடம்பெற்றுள்ளன. அதே நேரத்தில் இடதுசாரி கட்சிகள் தனித்துப் போட்டியிடுகின்றன.

தேர்தல் முடிவு... கூட்டணி வியூகத்தை மாற்றுமா?

அக்டோபர் 6ஆம் தேதி நடைபெறும் மதுராந்தகம் மற்றும் தாராபுரம் இடைத்தேர்தலில் பதிவாகும் வாக்குகள், அக்டோபர் 9ஆம் தேதி எண்ணப்பட உள்ளன.

இந்த இரு தொகுதிகளிலும் எந்தக் கட்சிக்கு மக்கள் ஆதரவு கிடைக்கிறது என்பது மட்டுமல்லாமல், அதிமுகவில் இருந்து தவெகவுக்கு சென்ற முன்னாள் எம்.எல்.ஏக்களுக்கு கிடைக்கும் ஆதரவு, பாமகவின் நடுநிலை முடிவு ஏற்படுத்தும் தாக்கம் உள்ளிட்ட பல்வேறு அம்சங்களும் அரசியல் கட்சிகளால் உன்னிப்பாக கவனிக்கப்படுகின்றன.

இதனால், அக்டோபர் 6 இடைத்தேர்தல் முடிவுகளை தொடர்ந்து தமிழ்நாடு அரசியலில் கூட்டணி கணக்குகள் மேலும் மாறுமா என்ற எதிர்பார்ப்பும் உருவாகியுள்ளது.