நடிகை திரிஷாவிடம் மன்னிப்பு கோரினார் மன்சூர் அலிகான்!

எனது சக திரைநாயகி திரிஷாவே என்னை மன்னித்துவிடு என சர்ச்சை கருத்து தொடர்பாக நடிகர் மன்சூர் அலிகான் மன்னிப்புக்கேட்டு அறிக்கை வெளியிட்டுள்ளார்.

சென்னையில் சமீபத்தில் பத்திரிகையாளர் சந்திப்பில், லியோ படம் தொடர்பான கேள்விக்கு, நடிகை திரிஷா குறித்து சர்ச்சைக்குரிய வகையில் நடிகர் மன்சூர் அலிகான் கருத்து தெரிவித்தார்.இதை கண்டித்து நடிகை திரிஷா தனது எக்ஸ் தளத்தில், “இவரை போன்ற நபர்கள் தான் மனித குலத்திற்கே அவப்பெயர் என்றும் இனி தனது திரைவாழ்வில் இவரை போன்ற நபர்களுடன் நடிக்க மாட்டேன்” என்றும் தெரிவித்தார். இந்த சம்பவத்திற்கு நடிகர் சங்கம், திரைப்பிரபலங்கள் கண்டனம் தெரிவித்தனர்.

இதுகுறித்து மன்சூர் அலிகான் மீது நடவடிக்கை எடுக்க தேசிய மகளிர் ஆணையம் தமிழக டிஜிபிக்கு கடிதம் அனுப்பியது.இந்த நிலையில் நடிகர் மன்சூர் அலிகான் மீது ஆயிரம் விளக்கு காவல்நிலையத்தில் 2 பிரிவுகளின் கீழ் வழக்குப்பதிவு செய்யப்பட்டது.இதுகுறித்து விளக்கம் அளிக்க சமீபத்தில் நடிகர் மன்சூர் அலிகானின் நுங்கம்பாக்கத்தில் உள்ள வீட்டிற்கு நேரில் சென்று போலீசார் நோட்டீஸ் வழங்கினர். 

இதனைத்தொடர்ந்து முன் ஜாமீன் கோரி சென்னை முதன்மை அமர்வு நீதிமன்றத்தில் மனுதாக்கல் செய்தார். பின்னர் அதனை வாபஸ் பெற்றார். நேற்று மதியம் அளவில் சென்னை ஆயிரம் விளக்கு காவல் நிலையத்தில் நேரில் ஆஜராகி விளக்கம் அளித்தார்.

பின்னர் செய்தியாளர்களிடம் பேசிய மன்சூர் அலிகான், “திரிஷா குறித்து தனிப்பட்ட முறையில் கருத்து தெரிவிக்கவில்லை.எனது கருத்து தொடர்பாக திரிஷா வருந்தி இருந்தால் தானும் வருந்துவதாக தெரிவித்தார்.மேலும் விசாரணை தொடர்பாக எப்போது அழைத்தாலும் ஆஜராக தயாராக இருப்பதாக தெரிவித்திருந்தார்.

இந்த நிலையில் நடிகை திரிஷாவிடம் மன்னிப்பு கேட்டு நடிகர் மன்சூர் அலிகான் அறிக்கை வெளியிட்டுள்ளார். அந்த அறிக்கையில், “ஒரு வாரமாக நடந்த கத்தியின்றி ரத்தமின்றி போரில் நான் வெற்றி? பெற்றுவிட்டேன்! எனக்காக வாதிட்ட தலைவர்கள், நடிகர்கள், ஊடகவியலாளர்கள் யாவோர்க்கும் நெஞ்சார்ந்த நன்றிகள். எதிர்த்து என்னை கண்டித்த மானுடர்களுக்கும் பணிவான வணக்கங்கள்.

கலிங்கத்துப் போர் முடிந்தது. லட்சக்கணக்காணோர் மாண்டு கிடக்க, சாம்ராட் அசோகனின் இதயத்தில் ரத்தம் வடிந்து,அஹிம்சையை தழுவினான்.ஆம். மனசாட்சியே இறைவன்.

காவல் அதிகாரி, அம்மையார் திரிஷாவின் மனது வருத்தப்பட்டிருக்கிறது எனச் சொல்ல, 'ஐயஹோ எனக்கும் வருத்தம் தான்' என வந்துவிட்டேன். யதார்த்த நிலை!
சட்டம் வென்று வெளியே வந்தால், மீண்டும் கோரப்பசியுடன் கோழிக் குஞ்சை கவ்வ வரும் வல்லூறுகளாக ஊடகம் துரத்துகிறது!! ஜனநாயகத்தின் நான்காவது தூண்,. மணிப்பூர், ஹாத்ரஸ் பெண் பல்கீஸ் பானு, நீட் அனிதாக்கள், வாச்சாத்தி வன் கொடுமைகள் நித்தம் மதக்கலவர வன்கொடுமைகளை சாட்டையடியாக கேள்வி கேட்க மறுக்கிறது.

எனது இளமைக்காலம் யாவும் திரைத்துறையில் இழந்து விட்டேன்.திமிங்கலமாக உலா வந்தாலும்,பாத்திரங்கள் சிறு மீன்களாகத்தான் அமைந்தது. இனி வரும் நாட்களாவது ஆக்கபூர்வமாக உழைக்க இறைவா சக்தியை கொடு!

என் மக்கள், மலடான பளபளக்கும் ரசாயண உரமேற்றப்பட்ட காய்கறிகளை உண்டு, விவசாயிகள் வீணர்களாக ஆக்கப்பட்டு, விளை நிலங்கள் கரிக்கட்டைகளாக மாறும். கனிமங்கள், மலை, ஆறு காணாடிக்கப்பட்டு, வேலையற்றவர்களாய் நிற்கிறோம்.

குழந்தைகள் கசடறகற்க, சூரியன் மறையும் முன் குடும்பம் காக்க மாங்குமாங்கு என்று உழைப்போம். மாதத்தில் 10 நாள் கடுமையாக உழைத்தால்தான் கரண்ட் பில் கட்ட முடியும். மீதி நாள் GST, ST, டோல்கேட், பெட்ரோல் கேஸ், ஸ்கூல் பீஸ், மளிகை வாங்க என, ஒன்றும் மிஞ்சமாட்டேங்கிறது. இன்னும் கடுமையாக ஏதாவது சம்பளத்திற்கு வேலை செய்தால்தான் நாம் அதானிக்கு கப்பம் கட்ட முடியும் அதானிந்தியா மார்பில் தவலும் குழந்தையுடன், இளமங்கை இளவரசியை கட்டிலில் விட்டுச்செல்ல நாம் புத்தனில்லை.

பெண்ணிலிருந்து தான் மனிதன் பிறக்கிறான். தாயின் காலடியில் சொர்க்கம். தாய்க்கு சேவை செய் என்றர் நபிகளார் அவர்கள். பெண்மை புனிதம். காரணத்தோடு தான் ஆண்மையை அழியுங்கள் என்றார் பெரியார்.

எனை ஈன்ற சபூரா மாள் பாம்புக்கடி, பூரான், தேள் கடித்து வருவோர்க்கு 8' வேளை தொழுது, ஓதி, ஊதி, கிராம்பு நீர் கொடுத்து, நற்கிருபைகள் செய்தவர். சினிமா பார்க்கவிடாது 10ஆம் வகுப்புவரை வளர்த்தவர். இனிமேலும் இம்மண்ணின் மீட்சிக்கு, சகோதரத்துவத்துடன் உழைக்க அருள் புரிவாய் இறைவா!! இறையச்சமே நம் குழந்தைகளின் நல்வாழ்க்கையை அருளும்!

எனது சக திரைநாயகி திரிஷாவே என்னை மன்னித்துவிடு!  இல்லறமாம் நல்லறத்தில் நின் மாங்கல்யம் தேங்காய் தட்டில் வலம்வரும்போது நான் ஆசிர்வதிக்கும் பாக்யத்தை இறைவன் தந்தருள்வானாக!! ஆமீன்” என கூறப்பட்டுள்ளது.