டெல்லியை வீழ்த்தி புள்ளி பட்டியலில் முன்னேறுமா சென்னை? சிஎஸ்கே ரசிகர்கள் எதிர்பார்ப்பு 

ஐபிஎல் தொடரின் 19ஆவது சீசன் தற்பொழுது இறுதிக்கட்டத்தை எட்டி வரும் நிலையில், இன்று நடைபெறும் 48ஆவது லீக் போட்டியில் ருதுராஜ் கெய்க்வாட் தலைமையிலான சென்னை சூப்பர் கிங்ஸ் அணி, அக்ஸர் படேல் தலைமையிலான டெல்லி கேப்பிட்டல்ஸ் அணியை எதிர்கொள்கிறது. இந்த முக்கியமான ஆட்டம் டெல்லி அருண் ஜெட்லி கிரிக்கெட் மைதானத்தில் நடைபெறவுள்ளது.

நடப்பு சீசனில் சென்னை அணி 9 போட்டிகளில் விளையாடி 4 வெற்றிகளுடன் புள்ளிப்பட்டியலில் 6ஆம் இடத்தில் உள்ளது. மும்பை இந்தியன்ஸ் அணிக்கு எதிரான கடந்த போட்டியில் பெற்ற வெற்றியைத் தொடர்ந்து, அதே உத்வேகத்துடன் சிஎஸ்கே இன்று களம் காணுகிறது. மறுபுறம், 8 புள்ளிகளுடன் 7ஆம் இடத்தில் உள்ள டெல்லி அணி, ராஜஸ்தான் ராயல்ஸ் அணிக்கு எதிராக 226 ரன்கள் என்ற இலக்கை எட்டிப் பிடித்த பலத்துடன் சென்னைக்கு பதிலடி கொடுக்கத் தயாராக உள்ளது.

சென்னை அணியில் ருதுராஜ், சஞ்சு சாம்சன், சர்ஃப்ராஸ் கான் போன்ற சிறந்த பேட்டர்களும், நூர் அஹ்மத், ஸ்பென்சர் ஜான்சன் போன்ற பந்துவீச்சாளர்களும் பலம் சேர்க்கின்றனர். டெல்லி அணியில் கேஎல் ராகுல், டிரிஸ்டன் ஸ்டப்ஸ், டேவிட் மில்லர் உள்ளிட்ட பேட்டிங் பட்டாளமும், நடராஜன், குல்தீப் யாதவ் மற்றும் மிட்செல் ஸ்டார்க் அடங்கிய பந்துவீச்சு கூட்டணியும் சிஎஸ்கே-விற்கு சவால் அளிக்கக் காத்திருக்கின்றனர்.

ஐபிஎல் வரலாற்றில் இவ்விரு அணிகளும் இதுவரை 32 முறை மோதியுள்ளதில், சென்னை 20 முறையும் டெல்லி 12 முறையும் வெற்றி பெற்றுள்ளன. அருண் ஜெட்லி மைதானத்தில் நடைபெற்ற 8 போட்டிகளில் சென்னை 6-2 என்ற கணக்கில் முன்னிலையில் உள்ளது. இந்த மைதானம் பொதுவாக பேட்டர்களுக்கு சாதகமாக இருந்தாலும், ஆட்டம் செல்லச் செல்ல சுழற்பந்து வீச்சாளர்கள் தாக்கத்தை ஏற்படுத்த வாய்ப்புள்ளது.