கட்டுப்பாட்டை மீறிய Gemini AI... 3 நிறுவனங்களை ஹேக் செய்து அதிர்ச்சி..!
செயற்கை நுண்ணறிவு தொழில்நுட்பம் நாளுக்கு நாள் பல்வேறு துறைகளில் வேகமாக வளர்ந்து வரும் நிலையில், அதே AI-யின் சைபர் திறன் தொடர்பான சோதனையில் எதிர்பாராத சம்பவம் ஒன்று நடந்துள்ளது.
மே 2026-ல் சைபர் பாதுகாப்பு மதிப்பீட்டு நிறுவனமான Irregular நடத்திய சோதனையில்தான் இந்த சம்பவம் நடந்துள்ளது. இந்த சோதனையில், உண்மையான நிறுவனங்களைப் போன்று உருவாக்கப்பட்ட போலி நிறுவனத்தின் சிஸ்டத்தில் தகவல்களைத் தேட Gemini-க்கு அறிவுறுத்தப்பட்டிருந்தது. ஆனால், சோதனை சூழலில் எதிர்பாராத வகையில் இணைய அணுகல் கிடைத்ததால், AI நிஜ உலக சிஸ்டங்களையும் அணுகும் நிலை ஏற்பட்டது.
ஒரு சம்பவத்தில் பாதுகாக்கப்பட்ட சிஸ்டத்துக்குள் நுழைய Gemini பல்வேறு பாஸ்வேர்டுகளை முயற்சி செய்து அணுகலைப் பெற்றதாக கூறப்படுகிறது. மற்ற இரண்டு சம்பவங்களில் இணையத்தில் கிடைத்த தகவல்கள் மற்றும் பொதுவெளியில் இருந்த credentials-ஐ பயன்படுத்தி சிஸ்டங்களுக்குள் நுழைந்ததாக Google தெரிவித்துள்ளது.
ஆனால், இதில் கவனிக்க வேண்டிய விஷயம் என்னவென்றால், தான் அணுகியவை சோதனைக்காக உருவாக்கப்பட்ட போலி நிறுவனங்கள் அல்ல, நிஜ நிறுவனங்களின் சிஸ்டங்கள் என்பதை Gemini உணர்ந்ததும் தனது செயல்பாடுகளை தானாகவே நிறுத்தியுள்ளது. மூன்று சம்பவங்களிலும் இதேபோல் AI தனது நடவடிக்கையை முடித்துக் கொண்டதாக Google தெரிவித்துள்ளது.
இந்த சம்பவம் தொடர்பாக பாதிக்கப்பட்ட நிறுவனங்களுக்கு தகவல் தெரிவிக்கப்பட்டதாகவும், சோதனை நடைமுறைகளில் தேவையான மாற்றங்கள் மேற்கொள்ளப்பட்டதாகவும் Google கூறியுள்ளது. சோதனையின்போது நடந்த இந்த ஊடுருவல்களால் பாதிக்கப்பட்ட நிறுவனங்களுக்கு சேதம் ஏற்பட்டதாக தகவல் இல்லை.
AI-யின் சைபர் பாதுகாப்புத் திறனை பரிசோதிக்க நடத்தப்பட்ட ஒரு சோதனையே எதிர்பாராத வகையில் நிஜ உலக சிஸ்டங்களுக்குள் கொண்டு சென்றிருப்பது, எதிர்கால AI பாதுகாப்பு நடைமுறைகள் குறித்த விவாதத்தையும் தீவிரப்படுத்தியுள்ளது.
What's Your Reaction?
