’அமரன்’ படைத்த புதிய சாதனை...!

அமரன் திரைப்படத்தை காண 24 மணி நேரத்தில் 4 லட்சத்து 85 ஆயிரம் பேர் முன்பதிவு செய்ததாக தகவல் வெளியாகியுள்ளது

சிவகார்த்திகேயன், சாய்பல்லவி நடித்துள்ள அமரன் திரைப்படம் தீபாவளி ஸ்பெஷலாக இன்று திரையரங்குகளில் வெளியாகி நல்ல வரவேற்பை பெற்று வருகிறது. ராஜ்குமார் பெரியசாமி இயக்கியுள்ள இந்தப் படத்தை, கமலின் ராஜ்கமல் ஃபிலிம்ஸ் தயாரித்துள்ளது. 

வீரமரணம் அடைந்த மேஜர் முகுந்த் வரதராஜனின் பயோபிக்காக உருவாகியுள்ளது இந்த திரைப்படம் குறித்து சிவகார்த்திகேயன், “பெருங்காதலும் ஒப்பில்லா வீரமும் தியாகமும் நிறைந்த மேஜர் முகுந்த் வரதராஜன் வாழ்க்கை பயணத்தை திரையில் வழங்குவதில் பெருமிதம் கொள்கிறேன். அனைவருக்கும் இனிய தீபாவளி நல்வாழ்த்துகள்” என பதிவிட்டு இருந்தார். 

நேற்றிரவு இந்தப் படத்தை பார்த்த தமிழ்நாடு முதலமைச்சர் மு.க.ஸ்டாலின், துணை முதலமைச்சர் உதயநிதி ஆகியோர் படம் நன்றாக உள்ளதாக பாராட்டி இருந்தனர். 

மேலும், அமரன் படத்தை ரசிகர்களுடன் சேர்ந்து பார்ப்பதற்காக சத்யம் திரையரங்கிற்குச் சென்றார் சிவகார்த்திகேயன். அப்போது ரசிகர்கள் அவருடன் செஃல்பி எடுத்து மகிழ்ந்தனர். அமரன் படம் முடிந்ததும் தியேட்டரை விட்டு வெளியே வந்து செய்தியாளர்களை சந்தித்த சிவகார்த்திகேயன், அமரன் படம் பார்த்துவிட்டு முதலமைச்சர் ஸ்டாலின் ரொம்பவே நெகிழ்ச்சியானதாகவும், மேஜர் முகுந்த் வரதராஜனின் தியாகத்துக்கு நியாயம் சேர்த்திருப்போம் என நம்புவதாகவும் கூறினார்.

அப்போது ரசிகை ஒருவர் சிவகார்த்திகேயனை பார்த்து ‘சின்ன தளபதி சிவகார்த்திகேயன்’ என தொடர்ந்து கத்திக்கொண்டே இருந்தார். இதனால் பதற்றமான சிவகார்த்திகேயன், ரசிகையிடம் “அதெல்லாம் வேண்டாம் மா” என்பதாக ரியாக்ஷன் கொடுக்க, அதன்பின்னரே அவர் அமைதியானார். 

இந்நிலையில், அமரன் திரைப்படத்தை காண 24 மணி நேரத்தில் 4 லட்சத்து 85 ஆயிரம் பேர் முன்பதிவு செய்ததாக தகவல் வெளியாகியுள்ளது. நேற்று திரையரங்குகளில் வெளியான நிலையில் புதிய சாதனை படைத்தது அமரன் திரைப்படம்.