Rajini Biopic: இளையராஜாவை தொடர்ந்து ரஜினி பயோபிக்… சூப்பர் ஸ்டார் ரோலில் அந்த ஹீரோவா..?

சென்னை: கோலிவுட் மட்டுமின்றி இந்தியத் திரையுலகையே தனது ஸ்டைலான நடிப்பால் கட்டிப் போட்டவர் சூப்பர் ஸ்டார் ரஜினிகாந்த். அபூர்வ ராகங்கள் படத்தில் தனது சினிமா கேரியரை தொடங்கிய ரஜினி, கடந்த 49 ஆண்டுகளில் எல்லாவிதமான ஏற்ற இறக்கங்களையும் பார்த்துவிட்டார். அட்டர் பிளாப், சூப்பர் ஹிட், இண்டஸ்ட்ரியல் ஹிட், பாக்ஸ் ஆபிஸ் ப்ளாஸ்ட், மோசமான வசூல் என ரஜினி பல தடைகளையும் வெற்றி மேடைகளையும் கடந்துவிட்டார். அதேபோல், அவ்வப்போது அரசியல் வாய்ஸ் கொடுத்துவிட்டு, இறுதியாக இனி சினிமா மட்டுமே என ஒதுங்கியதும் பலவிதமான விமர்சனங்களை சந்தித்தது. 

இப்போதும் ஜெயிலர் மூவி மூலம் பாக்ஸ் ஆபிஸில் சம்பவம் செய்த ரஜினி, இளம் ஹீரோக்களுக்கே டஃப் கொடுத்து வருகிறார். அடுத்தடுத்து வேட்டையன், கூலி படங்கள் ரஜினி நடிப்பில் வெளியாகவுள்ளன. இந்நிலையில், ரஜினியின் பயோ பிக் விரைவில் திரைப்படமாக உருவாகவுள்ளதாக தகவல்கள் வெளியாகியுள்ளன. சமீபத்தில் தான் இளையராஜாவின் பயோ பிக் படம் பற்றிய அபிஸியல் அப்டேட் வெளியானது. அருண் மாதேஸ்வரன் இயக்கும் இளையராஜா பயோ பிக் படத்தில் தனுஷ் நடிக்கிறார். 

இளையராஜா வரிசையில் ரஜினியின் பயோ பிக் படமும் உருவாகும் என ரசிகர்கள் எதிர்பார்த்திருந்தனர். அதனை கன்ஃபார்ம் செய்யும் விதமாக பாலிவுட் தயாரிப்பாளர் சஜித் நதியத்வாலா ரஜினியை சந்தித்த போட்டோ வைரலாகி வருகிறது. பாலிவுட்டில் சூப்பர் 30, 83, கிக் போன்ற படங்களை தயாரித்தவர் சஜித் நதியத்வாலா. இவர் ரஜினியின் நெருங்கிய நண்பர் என்றும் சொல்லப்படுகிறது. ரஜினியை சந்தித்த சஜித், அவரது பயோபிக் படத்தை தயாரிக்க அனுமதி வாங்கிவிட்டதாகத் தெரிகிறது. இதனையடுத்து ஸ்க்ரிப்ட் வேலைகள் முடிந்ததும் ரஜினியின் பயோபிக் பற்றிய அபிஸியல் அப்டேட் வெளியாகும் என எதிர்பார்க்கப்படுகிறது. 

ரஜினியின் பயோபிக் உறுதியானால் சூப்பர் ஸ்டார் கேரக்டரில் யார் நடிப்பார் என்பது தான் ரசிகர்களின் இப்போதைய விவாதமாக உள்ளது. ரஜினியுடன் ஒரு படத்திலாவது இணைந்து நடிக்க வேண்டும் என்பது தனுஷின் ஆசை. மேலும், இளையராஜா மூவி போல ரஜினியின் பயோ பிக் படத்தில் நடிக்க வேண்டும் என்பதும் தனுஷின் வாழ்நாள் லட்சியம். அதனால் இந்த வாய்ப்பு தனுஷுக்கு கிடைக்குமா அல்லது சிவகார்த்திகேயனுக்கு ஜாக்பாட் அடிக்குமா என ரசிகர்கள் எதிர்பார்த்து காத்திருக்கின்றனர்.