அதிமுகவில் மீண்டும் வெடிக்கும் உள்கட்சி மோதல்? ..... வேலுமணி Vs பொன்னையன்!

அதிமுகவின் உள்கட்சி அரசியலில் மீண்டும் பரபரப்பு ஏற்பட்டுள்ளது. முன்னாள் அமைச்சர் சி.பொன்னையன், முன்னாள் அமைச்சர் மற்றும் தொண்டாமுத்தூர் தொகுதி சட்டமன்ற உறுப்பினருமான எஸ்.பி.வேலுமணியை கடுமையாக விமர்சித்து பல்வேறு குற்றச்சாட்டுகளை முன்வைத்துள்ளார்.

அதிமுகவின் மூத்த தலைவர்களில் ஒருவரான சி.பொன்னையன், எம்.ஜி.ஆர் மற்றும் ஜெயலலிதாவின் பெயர்களை குறிப்பிட்டு எஸ்.பி.வேலுமணிக்கு எதிராக கடுமையான விமர்சனங்களை முன்வைத்துள்ளார். குறிப்பாக, “எம்.ஜி.ஆரையும், ஜெயலலிதாவையும் ஏமாற்றி சொத்து சேர்த்தவர் எஸ்.பி.வேலுமணி. எம்.ஜி.ஆரின் ஆவி அவரை சும்மாவே விடாது” என அவர் தெரிவித்ததாக கூறப்படுகிறது.

ஜெயலலிதா உயிருடன் இருந்த காலத்தில் அவரது நம்பிக்கையைப் பெற்றிருந்த வேலுமணி, அந்த நம்பிக்கையை தவறாகப் பயன்படுத்தி சொத்துகளைச் சேர்த்ததாகவும் பொன்னையன் குற்றம்சாட்டியுள்ளார். மேலும், அதிமுகவை உருவாக்கிய எம்.ஜி.ஆரின் கொள்கைகளுக்கும், ஜெயலலிதாவின் வழிகாட்டுதல்களுக்கும் மாறாக சிலர் செயல்பட்டதாகவும் அவர் விமர்சித்துள்ளார்.

கூட்டணி கட்சிகளையும் விமர்சித்த பொன்னையன்

இதனிடையே, திமுகவின் கூட்டணி கட்சிகளையும் சி.பொன்னையன் கடுமையாக விமர்சித்துள்ளார். “திமுகவின் கூட்டணி கட்சிகள் எல்லாம் லீசுக்கு சென்றுள்ளன. 6 மாதம் அல்லது 11 மாதம் லீஸ் முடிந்ததும் மீண்டும் ஓனரிடம் வந்துவிடும்” என்று அவர் பேசியதாக கூறப்படுகிறது. திமுக தலைமையிலான கூட்டணியில் இடம்பெற்றுள்ள கட்சிகளின் அரசியல் நிலைப்பாடுகள் குறித்தும் அவர் கேள்வி எழுப்பியுள்ளார். தேர்தல் காலத்தில் கூட்டணி அமைத்து செயல்படும் கட்சிகள், குறிப்பிட்ட காலத்திற்குப் பிறகு மீண்டும் தங்களது அரசியல் நிலைப்பாட்டிற்கு திரும்பிவிடும் என்ற கருத்தை அவர் முன்வைத்துள்ளார்.

அதிமுகவில் மீண்டும் வெடிக்கும் உள்கட்சி மோதல்?

ஜெயலலிதா மறைவுக்குப் பிறகு அதிமுகவில் ஏற்பட்ட தலைமைப் போட்டி, அதிகார மோதல், அணிப் பிரிவு உள்ளிட்ட விவகாரங்கள் தொடர்ந்து அரசியல் களத்தில் பேசுபொருளாக இருந்து வருகின்றன. இந்த நிலையில், கட்சியின் மூத்த தலைவர்களில் ஒருவரான சி.பொன்னையன், எஸ்.பி.வேலுமணிக்கு எதிராக இவ்வாறு பகிரங்கமாக கடுமையான விமர்சனங்களை முன்வைத்திருப்பது அதிமுக வட்டாரத்தில் மீண்டும் பரபரப்பை ஏற்படுத்தியுள்ளது.

குறிப்பாக, எம்.ஜி.ஆர் மற்றும் ஜெயலலிதாவின் பெயர்களை மையப்படுத்தி வேலுமணிக்கு எதிராக முன்வைக்கப்பட்டுள்ள இந்தக் குற்றச்சாட்டுகள், அதிமுகவின் உள்கட்சி அரசியலில் புதிய விவாதத்தை ஏற்படுத்தும் சூழலை உருவாக்கியுள்ளது.