இந்தியா - பாகிஸ்தான் எல்லையில் பதற்றம் ! வெடி வைத்து ரயிலைத் தகர்க்க சதியா?

ராஜஸ்தானில் இந்தியா – பாகிஸ்தான் சர்வதேச எல்லை அருகே ரயில் தண்டவாளத்தில் ஏற்பட்ட வெடிப்பு பெரும் பரபரப்பை ஏற்படுத்தியுள்ளது. இந்த சம்பவத்தைத் தொடர்ந்து அனுப்கர் – சூரத்கர் இடையேயான ரயில் சேவைகள் தற்காலிகமாக நிறுத்தப்பட்டுள்ளன.

தண்டவாளத்தில் 2 அடி பள்ளம்!

ராஜஸ்தான் மாநிலம் ஸ்ரீகங்காநகர் மாவட்டத்தில் உள்ள 50 ஜிபி பகுதி அருகே அனுப்கர் – சூரத்கர் ரயில் பாதையில் இந்த வெடிப்பு நிகழ்ந்துள்ளது. இதில் தண்டவாளத்தைத் தாங்கும் 2 சிமெண்ட் தூண்கள் மற்றும் ரயில் பாதையில் உள்ள ஸ்லீப்பர்கள் சேதமடைந்துள்ளன. மேலும், தண்டவாளத்தின் கீழே சுமார் 2 அடி ஆழத்திற்கு பள்ளம் ஏற்பட்டுள்ளது.

இரவு 9 மணியளவில் அனுப்கரில் இருந்து சூரத்கர் நோக்கிச் சென்ற ரயில் அந்தப் பகுதியைக் கடந்து சென்றுள்ளது. இதற்கு சுமார் 45 நிமிடங்களுக்குப் பிறகு, இரவு 9.45 மணியளவில் வெடிப்பு நிகழ்ந்ததாகக் கூறப்படுகிறது. வெடிப்புச் சத்தம் சுமார் 200 மீட்டர் தொலைவு வரை கேட்டதாகவும் தகவல்கள் தெரிவிக்கின்றன.

சம்பவ இடத்திற்கு விரைந்த பாதுகாப்புப் படைகள்!

வெடிப்பு சம்பவம் குறித்து தகவல் கிடைத்ததும், தீவிரவாத தடுப்புப் பிரிவு (ATS), குற்றப் புலனாய்வுத் துறை (CID), மோப்ப நாய் பிரிவு, ரயில்வே பாதுகாப்புப் படை (RPF) மற்றும் ரயில்வே அதிகாரிகள் சம்பவ இடத்திற்கு விரைந்தனர்.

அதிகாலை 2 மணியளவில் பாதுகாப்புப் படையினர் சம்பவ இடத்தை ஆய்வு செய்தனர். முன்னெச்சரிக்கை நடவடிக்கையாக அனுப்கர் – சூரத்கர் இடையேயான ரயில் சேவைகள் காலை 9 மணி வரை நிறுத்தப்பட்டன.

7.5 கிலோ RDX வெடிபொருளுடன் தொடர்பா?

இந்தியா – பாகிஸ்தான் எல்லைப் பகுதியில் அண்மையில் 7.5 கிலோ RDX வெடிபொருள் கைப்பற்றப்பட்டிருந்த நிலையில், தற்போது ரயில் தண்டவாளத்தில் ஏற்பட்ட வெடிப்பு பாதுகாப்பு அமைப்புகளிடையே கூடுதல் கவனத்தை ஏற்படுத்தியுள்ளது.

இதுகுறித்து ஸ்ரீகங்காநகர் மாவட்ட காவல் கண்காணிப்பாளர் ஹரிசங்கர் கூறுகையில், 50 ஜிபி கிராமம் அருகே ரயில் தண்டவாளத்தைத் தாங்கும் 2 சிமெண்ட் தூண்கள் வெடிப்பில் சேதமடைந்துள்ளன. சம்பவ இடத்தில் தடயவியல் அறிவியல் ஆய்வக (FSL) குழுவினர் ஆய்வு மேற்கொள்ள உள்ளனர்.

மேலும், அண்மையில் கைப்பற்றப்பட்ட 7.5 கிலோ RDX வெடிபொருளுக்கும் இந்த சம்பவத்திற்கும் தொடர்பு இருப்பதாக இதுவரை உறுதிப்படுத்தப்படவில்லை என்றும், சம்பவத்தின் தன்மை குறித்து இப்போதே முடிவுக்கு வர முடியாது என்றும் அவர் தெரிவித்துள்ளார்.

பயணிகள் ரயிலைத் தகர்க்க சதியா?

ரயில் கடந்து சென்ற 45 நிமிடங்களுக்குப் பிறகு வெடிப்பு நிகழ்ந்திருப்பது பல்வேறு சந்தேகங்களை எழுப்பியுள்ளது. ரயில் தண்டவாளம் திட்டமிட்டு சேதப்படுத்தப்பட்டதா? பயணிகள் ரயிலைத் தகர்க்க சதி நடந்ததா? என்ற கோணங்களில் விசாரணை நடைபெற்று வருகிறது.

ராம்சிங்பூர் காவல் நிலைய எல்லைக்குட்பட்ட இந்த சம்பவத்தில், வெடிப்புக்கான உண்மையான காரணம் என்ன என்பது தடயவியல் ஆய்வு முடிவுகளுக்குப் பிறகே தெரியவரும். இதனால் இந்தியா – பாகிஸ்தான் எல்லைப் பகுதியில் பாதுகாப்பு நடவடிக்கைகள் தீவிரமடைந்துள்ளன.

ரயில் தண்டவாளத்தில் ஏற்பட்ட இந்த மர்ம வெடிப்பு, எல்லைப் பகுதியில் பெரும் பரபரப்பை ஏற்படுத்தியுள்ளது.