புரட்டாசி, ஐப்பசியில்...குலம் காக்கும் குலசாமி!

பலன் தரும் பரிகாரம்..! - வி.ராம்ஜி

குலதெய்வ வழிபாட்டைச் செய்வதால், மனம் குளிர்ந்து நம்மையும் நம் குடும்பத்தையும் நம் வம்சத்தையும் குலதெய்வம் காத்தருளும் என்பது ஐதீகம். முக்கியமாக, குலதெய்வ வழிபாட்டைச் செய்யும் போதெல்லாம் நம் முன்னோர்கள் அதாவது பித்ருக்கள், நம்மை ஆசீர்வதித்து அருளுவார்கள். தெய்வமாகவே இருந்து நம்மை எப்போதும் காப்பார்கள் என்கிறது சாஸ்திரம்!

வழிபாடு என்பது மிக முக்கியமானது. நம் கர்ம வினைகளை அகற்றவும் நாம் எப்போதோ, எந்த ஜென்மத்திலோ செய்த பாவ புண்ணியங்களுக்கு உரிய பலன்களைக் கொடுப்பதும் நம்முடைய வழிபாடுகளால் கெடுபலன்கள் குறைவாகவும் நற்பலன்கள் அதிகமாகவும் நிகழ்கின்றன என்கிறது சாஸ்திரம்.

வழிபாடுகளில் இஷ்ட தெய்வ வழிபாட்டுக்கு மிகவும் முக்கியத்துவம் கொடுக்கிறோம். பிரசித்தி பெற்ற ஆலயங்களுக்குச் செல்வதும் பரிகாரத் திருத்தலங்களுக்குச் சென்று பிரார்த்தனை செய்வதும் என கோயில்களுக்கு செல்கிறோம். இவற்றையெல்லாம் விட முக்கியமான வழிபாடாக குலதெய்வ வழிபாடு அமைந்துள்ளது என நம் முன்னோர்கள் வழிபட்டுச் சென்று வழிகாட்டியிருக்கிறார்கள்.

குலதெய்வம் என்பது சக்தி வாய்ந்த தெய்வமாகப் போற்றப்படுகிறது. ஒவ்வொரு குடும்பத்துக்கும் குலதெய்வம் என்பது அமைந்திருக்கும். வாழையடி வாழையாக வம்சம் வளருவது போல், குலதெய்வ வழிபாடு தொடர்ந்து கொண்டே இருக்கும். இருக்கவேண்டும். நம் வம்சம், வாழையடி வாழையாக செழித்து வளருவதற்கு உறுதுணையாகவும் பக்கபலமாகவும் இருப்பது குலதெய்வ வழிபாடு என்கிறார்கள் ஆச்சார்யப் பெருமக்கள்.

பெரும்பாலும் குலதெய்வம் என்பது கிராம தெய்வங்களாக, கிராம தேவதைகளாகவே அமைந்திருக்கும். இன்னும் குறிப்பாகச் சொல்லவேண்டுமெனில், பெண் தெய்வமாகவே குலசாமி அமைந்திருக்கும். இன்றைக்கு தெய்வங்களாக வணங்குகிறோம். ஒருகாலத்தில் தெய்வத்துக்கு நிகரான, தெய்வம் என்று எல்லோரும் வணங்கக் கூடிய வகையில், வாழ்ந்தவர்களாகவே இருப்பார்கள் என்று நாட்டார் தெய்வங்கள் நூலில் விவரிக்கப்பட்டுள்ளது.

அதனால்தான், நம் குடும்பத்தில் எப்போதோ சாந்நித்தியத்துடன் வாழ்ந்து வழிகாட்டியவரை, குலதெய்வம் என்று சொல்கிறோம். வணங்குகிறோம். போற்றுகிறோம். ‘எங்க குலவம்சத்தை நீதான் காக்கணும்’ என்று மனமுருகிப் பிரார்த்தனை செய்கிறோம்.

குலதெய்வ வழிபாட்டை தொடர்ந்து செய்து வரவேண்டும். சமயம் கிடைக்கும்போதெல்லாம் குலதெய்வத்தை தரிசித்து வருவதை வழக்கமாகக் கொள்ளவேண்டும். வீட்டில் விசேஷம், வைபவம் நடக்கும் போதெல்லாம் முன்னதாக, ‘இந்த விழா நல்லவிதமாக நடப்பதற்கு, தங்கு தடை இல்லாமல், சண்டை சச்சரவு இல்லாமல் நடப்பதற்கு, எப்போதும் போலவே பக்கத்துணையாக இருக்கவேண்டும்’ என்று வேண்டிக்கொண்டு விசேஷத்தை நடத்துகிறோம்.

வருடத்துக்கு ஒருமுறையேனும் குலதெய்வக் கோயிலுக்குச் செல்லவேண்டும். குடும்ப முறைப்படி மாவிளக்கு ஏற்றுவதோ, பொங்கல் படையலிடுவதோ செய்யவேண்டும்.

குலதெய்வத்தை எந்தநாளும் வணங்கலாம். எப்போது வேண்டுமானாலும் தரிசிக்கலாம். முக்கியமாக, மாசி மாதம், புரட்டாசி மாதம், ஐப்பசி மாதம், ஆடி மாதம், தை மாதம் என்பவை குலதெய்வத்தை வணங்குவதற்கு அற்புதமான மாதங்களாகச் சொல்லப்பட்டிருக்கின்றன. இந்த மாதங்களில் ஏதேனும் ஒருநாளில், குலதெய்வத்தை வீட்டில் இருந்து வழிபடலாம். அடுத்து... கோயிலுக்குச் சென்றும் வழிபடலாம். வீட்டில் விளக்கேற்றி, மாவிளக்கிட்டு குடும்பமாக அமர்ந்து பிரார்த்தனை செய்யவேண்டும். கூட்டு வழிபாடு என்பதுதான் குலதெய்வ வழிபாட்டின் மிகப்பெரிய கோட்பாடும் கொள்கையாகவும் அமைந்திருக்கிறது!

குலதெய்வ வழிபாட்டைச் செய்வதால், மனம் குளிர்ந்து நம்மையும் நம் குடும்பத்தையும் நம் வம்சத்தையும் குலதெய்வம் காத்தருளும் என்பது ஐதீகம். முக்கியமாக, குலதெய்வ வழிபாட்டைச் செய்தால்தான், நம் முன்னோர்கள் என்கிற பித்ருக்கள், நம்மை ஆசீர்வதித்து அருளுவார்கள். ஆகவே, குலதெய்வ வழிபாட்டுக்கும் முன்னோர் வழிபாட்டுக்கும் ஒரு முடிச்சு இணைக்கப்பட்டிருப்பது போல், நம் முந்தைய பரம்பரைக்கும் அடுத்தடுத்த பரம்பரைக்கும் முடிச்சு உள்ளது என்பதை உணர்ந்து குலசாமியைக் கும்பிடுவோம்!