வெளியேறும் 10 எம்.ஏ.க்கள்..? கட்சிக்குள் வெடித்த பூகம்பம்..? கலக்கத்தில் விஜய்..!

தேர்தலுக்கு முன்பாக மாற்று அரசியலை முன்னிறுத்தி மக்களிடம் ஆதரவு கோரிய தவெக, தேர்தலில் எதிர்பார்த்ததை விட அதிக வெற்றியைப் பெற்றது. ஆட்சி அமைத்த பின்னர் கூட்டணிக் கட்சிகளுக்கும் உரிய முக்கியத்துவம் வழங்க வேண்டும் என்ற நோக்கத்தில் காங்கிரஸ், கம்யூனிஸ்ட் கட்சிகள், இந்திய யூனியன் முஸ்லிம் லீக் மற்றும் விடுதலைச் சிறுத்தைகள் கட்சி உள்ளிட்ட கூட்டணி கட்சிகளுக்கு அமைச்சரவையில் இடம் ஒதுக்கப்பட்டது. அதன்படி காங்கிரஸ் கட்சிக்கு இரண்டு அமைச்சர் பதவிகளும், இந்திய யூனியன் முஸ்லிம் லீக் மற்றும் விடுதலைச் சிறுத்தைகள் கட்சிகளுக்கு தலா ஒரு அமைச்சர் பதவியும் வழங்கப்பட்டன.

அதேநேரத்தில், தமிழக வெற்றிக் கழகத்தைச் சேர்ந்த 31 எம்எல்ஏக்கள் அமைச்சர்களாக நியமிக்கப்பட்டனர். சபாநாயகராக தேர்வு செய்யப்பட்ட ஜே.சி.டி. பிரபாகரை தவிர்த்து மீதமுள்ள பல எம்எல்ஏக்களுக்கு அமைச்சரவை வாய்ப்பு கிடைக்கவில்லை. தேர்தலுக்கு முன்பும் தேர்தல் காலத்திலும் கட்சிக்காக தீவிரமாக உழைத்த பலர், தங்களுக்கு அமைச்சரவை அல்லது கட்சி அமைப்பில் முக்கிய பொறுப்புகள் வழங்கப்படும் என்று எதிர்பார்த்திருந்ததாக கூறப்படுகிறது.

குறிப்பாக, கொளத்தூர் தொகுதியில் முன்னாள் முதலமைச்சர் மு.க.ஸ்டாலினை தோற்கடித்து மாநில அரசியலின் கவனத்தை தன் பக்கம் திருப்பிய வி.எஸ்.பாபுவுக்கு அமைச்சர் பதவி வழங்கப்படாதது கட்சிக்குள் பெரும் விவாதத்தை ஏற்படுத்தியதாக தகவல்கள் தெரிவிக்கின்றன . தேர்தலில் மிகப்பெரிய அரசியல் வெற்றியை பெற்றும், அமைச்சரவையில் இடம் கிடைக்காதது அவரது ஆதரவாளர்களிடையே அதிருப்தியை உருவாக்கியதாக கூறப்பட்டது. அமைச்சரவை பட்டியல் வெளியான பிறகு தனது ஏமாற்றத்தை அவர் மறைமுகமாக வெளிப்படுத்தியிருந்ததாகவும் அரசியல் வட்டாரங்கள் தெரிவித்தன.

இந்நிலையில், தற்போது தவெகவைச் சேர்ந்த சுமார் 10 எம்எல்ஏக்கள் மாவட்ட செயலாளர் பதவி வழங்க வேண்டும் என்று கட்சித் தலைமையிடம் கோரிக்கை விடுத்துள்ளதாக தகவல்கள் வெளியாகியுள்ளன. கட்சி ஆட்சிக்கு வந்த பின்னரும், தங்களுக்கு எந்தவித நிர்வாக அல்லது அமைப்புப் பொறுப்புகளும் வழங்கப்படவில்லை என்ற மனக்குறை அவர்களிடம் இருப்பதாக கூறப்படுகிறது.

அமைச்சரவை வாய்ப்பு கிடைக்காததை ஏற்றுக்கொண்டாலும், குறைந்தபட்சம் கட்சி அமைப்பில் முக்கிய பொறுப்புகள் வழங்கப்பட வேண்டும் என்பதே அவர்களின் நிலைப்பாடாக இருப்பதாக தெரிகிறது. மாவட்ட செயலாளர் பதவி என்பது கட்சியின் அடித்தள அமைப்பை கட்டுப்படுத்தும் முக்கிய பொறுப்பாக கருதப்படுவதால், அதனை பெறுவதற்கான போட்டி தவெகவுக்குள் தற்போது அதிகரித்துள்ளதாக கூறப்படுகிறது.

"அமைச்சர் பதவி கிடைக்கவில்லை. மாவட்ட அளவிலான கட்சி பொறுப்புகளும் வழங்கப்படவில்லை. மக்கள் மத்தியில் தொடர்ந்து செயல்பட எங்களுக்கு அதிகாரபூர்வமான பொறுப்புகள் தேவை" என்று சில எம்எல்ஏக்கள் கட்சித் தலைமையிடம் தெரிவித்துள்ளதாக தகவல்கள் வெளியாகியுள்ளன. இதன் காரணமாக, மாவட்ட செயலாளர் பதவிகளை யாருக்கு வழங்குவது என்பது கட்சித் தலைமைக்கு புதிய சவாலாக மாறியுள்ளது.

இதுவரை தமிழக அரசியலில் தேர்தல் தோல்விக்குப் பிறகு அதிமுகவில் ஏற்பட்ட உள்கட்சி மோதல்கள், தலைமைப் போட்டிகள் மற்றும் நிர்வாக குழப்பங்களே அதிகம் பேசப்பட்டு வந்தன. ஆனால் தற்போது ஆட்சிப் பொறுப்பேற்ற ஒரு மாத காலத்திலேயே தவெகவிலும் பதவி மற்றும் பொறுப்புகள் தொடர்பான அதிருப்தி வெளிப்படத் தொடங்கியுள்ளது அரசியல் நோக்கர்களின் கவனத்தை ஈர்த்துள்ளது.

அரசியல் கட்சிகளில் வெற்றிக்குப் பிறகு பதவி எதிர்பார்ப்புகள் உருவாகுவது இயல்பான ஒன்றாக இருந்தாலும், புதிதாக உருவான கட்சியான தவெகவுக்கு இது முதல் பெரிய உள்கட்சி சோதனையாக பார்க்கப்படுகிறது. தேர்தல் வெற்றிக்கு பங்களித்த அனைவரையும் திருப்திப்படுத்துவது எந்தக் கட்சித் தலைமையுக்கும் எளிதான காரியம் அல்ல. அதிலும் முதல் முறையாக ஆட்சிப் பொறுப்பேற்றுள்ள கட்சிக்கு இது மிகப்பெரிய நிர்வாக மற்றும் அரசியல் சவாலாக மாறியுள்ளது.

எனவே, அதிருப்தியில் இருப்பதாக கூறப்படும் எம்எல்ஏக்களை விஜய் எவ்வாறு சமாதானப்படுத்தப் போகிறார்? மாவட்ட செயலாளர் உள்ளிட்ட முக்கிய பொறுப்புகள் வழங்கப்பட்டு இந்த பிரச்சனைக்கு முற்றுப்புள்ளி வைக்கப்படுமா? அல்லது இது எதிர்காலத்தில் மேலும் பல எம்எல்ஏக்களின் அதிருப்திக்கு வழிவகுக்குமா? என்ற கேள்விகள் தற்போது அரசியல் வட்டாரங்களில் பரவலாக விவாதிக்கப்பட்டு வருகின்றன.

ஆட்சியின் முதல் மாதத்திலேயே கட்சிக்குள் எழுந்துள்ள இந்த பதவி விவகாரம், தமிழக வெற்றிக் கழகத்தின் அமைப்பு வலிமை மற்றும் தலைமைத்துவ திறனை சோதிக்கும் முக்கியமான அரசியல் நிகழ்வாக பார்க்கப்படுகிறது.