சென்னையின் பௌலிங் கோச் ஆகும் OG CSK பிளேயர் ! ஜாகீர் கானின் மாஸ்டர் பிளான் !

2027 ஐபிஎல் தொடருக்கு முன்னதாக சென்னை சூப்பர் கிங்ஸ் அணி தனது பயிற்சியாளர் குழுவில் பல்வேறு மாற்றங்களை மேற்கொண்டு வருகிறது. நீண்ட காலமாக அணியை வழிநடத்திய பயிற்சியாளர் குழுவில் மாற்றங்கள் செய்யப்பட்டுள்ள நிலையில், தற்போது பந்துவீச்சு பயிற்சியாளர் பொறுப்பிலும் புதிய நியமனம் செய்யப்பட உள்ளதாக தகவல் வெளியாகியுள்ளது.

ஐபிஎல் வரலாற்றில் அதிக வெற்றிகளை பெற்ற அணிகளில் ஒன்றாக விளங்கும் சிஎஸ்கே, இதுவரை 5 முறை சாம்பியன் பட்டத்தை கைப்பற்றியுள்ளது. இருப்பினும் 2023ஆம் ஆண்டுக்குப் பிறகு கோப்பையை வெல்ல முடியாத நிலையில், அடுத்த சீசனுக்காக அணியை வலுப்படுத்தும் முயற்சியில் நிர்வாகம் தீவிரமாக ஈடுபட்டு வருகிறது.

தலைமை பயிற்சியாளராக ஜாகீர் கான் :

சென்னை சூப்பர் கிங்ஸ் அணியின் நீண்ட கால தலைமை பயிற்சியாளராக செயல்பட்டு வந்த ஸ்டீபன் பிளெமிங் விலகியதை தொடர்ந்து, இந்திய அணியின் முன்னாள் வேகப்பந்து வீச்சாளர் ஜாகீர் கான் புதிய தலைமை பயிற்சியாளராக பொறுப்பேற்றுள்ளார்.

அதேபோல், பேட்டிங் பயிற்சியாளராக இருந்த மைக் ஹஸ்ஸி ஆஸ்திரேலிய அணியுடன் இணைந்துள்ளதால், சிஎஸ்கே அணியின் பயிற்சியாளர் குழுவில் புதிய மாற்றங்கள் செய்யப்பட்டு வருகின்றன.

பந்துவீச்சு பயிற்சியாளர் பதவிக்கு மோஹித் சர்மா?

இந்த நிலையில், சென்னை அணியின் புதிய பந்துவீச்சு பயிற்சியாளராக முன்னாள் இந்திய வேகப்பந்து வீச்சாளர் மோஹித் சர்மா நியமிக்கப்பட உள்ளதாக தகவல்கள் வெளியாகியுள்ளன.

தற்போது பந்துவீச்சு ஆலோசகராக செயல்பட்டு வரும் எரிக் சைமன்ஸுக்கு பதிலாக மோஹித் சர்மா பொறுப்பேற்கலாம் என கூறப்படுகிறது. எனினும் இதுகுறித்த அதிகாரப்பூர்வ அறிவிப்பு இன்னும் வெளியாகவில்லை.

ஜாகீர் கானின் ஆலோசனையின் அடிப்படையில் இந்த முடிவு எடுக்கப்பட்டுள்ளதாக சிஎஸ்கே நிர்வாக தரப்பில் இருந்து தகவல்கள் தெரிவிக்கின்றன.

சிஎஸ்கேவுடன் பழைய தொடர்பு கொண்ட மோஹித் சர்மா :

ஹரியானாவைச் சேர்ந்த மோஹித் சர்மா, சென்னை சூப்பர் கிங்ஸ் அணிக்காக ஏற்கனவே விளையாடிய அனுபவம் கொண்டவர். 2013ஆம் ஆண்டு சிஎஸ்கே அணியில் அறிமுகமான அவர், அடுத்த சில ஆண்டுகளில் அணியின் முக்கிய வேகப்பந்து வீச்சாளராக உருவெடுத்தார்.

சிஎஸ்கே அணிக்காக விளையாடிய காலகட்டத்தில் சிறப்பாக செயல்பட்ட மோஹித் சர்மா, 3 சீசன்களில் 57 விக்கெட்டுகளை கைப்பற்றி தனது திறமையை வெளிப்படுத்தினார்.

பின்னர் பஞ்சாப் கிங்ஸ், குஜராத் டைட்டன்ஸ், டெல்லி கேபிடல்ஸ் உள்ளிட்ட அணிகளுக்காகவும் அவர் விளையாடியுள்ளார். குறிப்பாக 2023 ஐபிஎல் சீசனில் குஜராத் அணிக்காக 27 விக்கெட்டுகளை வீழ்த்தி மீண்டும் தனது திறமையை நிரூபித்தார்.

இந்திய அணியிலும் முத்திரை பதித்த வீரர் :

மோஹித் சர்மா இந்திய அணிக்காக 34 சர்வதேச போட்டிகளில் விளையாடியுள்ளார். அதில் பெரும்பாலான போட்டிகளில் முன்னாள் கேப்டன் மகேந்திர சிங் தோனி தலைமையிலான அணியில் இடம்பெற்றார்.

2015 உலகக்கோப்பை தொடரில் இந்திய அணியின் முக்கிய வேகப்பந்து வீச்சாளர்களில் ஒருவராக விளங்கிய அவர், கட்டுப்படுத்தப்பட்ட பந்துவீச்சால் ரசிகர்களின் கவனத்தை ஈர்த்தார்.

ஜாகீர் கான் - மோஹித் சர்மா கூட்டணி :

மோஹித் சர்மாவின் பந்துவீச்சு முறை, அதிவேகத்தை மட்டுமே நம்பியதாக இல்லாமல், பந்தின் வேகத்தை மாற்றி வீசுதல், ஸ்லோவர் பால், நக்கிள் பால், துல்லியமான யார்க்கர் போன்ற நுணுக்கங்களை அடிப்படையாக கொண்டது.

குறிப்பாக டெத் ஓவர்களில் பந்துவீச்சாளர்களை கையாள்வதில் அவருக்கு இருக்கும் அனுபவம், சிஎஸ்கே அணியின் இளம் வேகப்பந்து வீச்சாளர்களுக்கு பயனுள்ளதாக இருக்கும் என எதிர்பார்க்கப்படுகிறது.

ஜாகீர் கான் மற்றும் மோஹித் சர்மா ஆகிய முன்னாள் இந்திய வேகப்பந்து வீச்சாளர்கள் இணைந்து செயல்படுவது, 2027 ஐபிஎல் தொடருக்கான சிஎஸ்கே அணியின் பந்துவீச்சு திட்டத்தில் முக்கிய மாற்றமாக பார்க்கப்படுகிறது.