234 தொகுதிகளுக்கும் ஸ்கெட்ச்.. தனுஷின் சைலண்ட் மூவ்... உளவுத்துறைக்கு பறந்த உத்தரவு..?
தமிழ்நாடு அரசியலில் நடிகர்களின் அரசியல் பிரவேசம் தொடர்ந்து கவனம் ஈர்த்து வரும் நிலையில், நடிகர் தனுஷின் சைலண்ட் மூவ் ஒன்றை கண்காணிக்க உளவுத்துறை உத்தரவிடப்பட்டுள்ளதாக தகவல் வெளியாகியுள்ளது.
தனது பிறந்தநாள் நிகழ்ச்சியில் தனுஷ் அறிமுகப்படுத்திய கொடி மற்றும் அவர் பேசிய சில கருத்துகள், அவரது அரசியல் நோக்கம் குறித்த கேள்விகளை எழுப்பியிருந்தன. இதைத் தொடர்ந்து, மாநிலம் முழுவதும் ரசிகர் மன்ற கட்டமைப்பை விரிவுபடுத்தும் முயற்சிகள் நடைபெற்று வருவதாக அரசியல் வட்டாரங்களில் பேசப்படுகிறது.
குறிப்பாக, தமிழகத்தின் 234 சட்டமன்றத் தொகுதிகளிலும் ரசிகர் மன்ற நிர்வாகத்தை ஒருங்கிணைத்து, உறுப்பினர் சேர்க்கையை விரைவுபடுத்த திட்டமிடப்பட்டுள்ளதாக தகவல்கள் தெரிவிக்கின்றன. முதல்கட்டமாக கோவை உள்ளிட்ட கொங்கு மண்டலப் பகுதிகளில் இந்த பணிகள் வேகமெடுத்துள்ளதாகவும் கூறப்படுகிறது. இதன் மூலம் ஒவ்வொரு தொகுதியிலும் தனுஷுக்கு இருக்கும் ஆதரவு எந்த அளவில் உள்ளது என்பதை அறிந்து கொள்ளும் முயற்சி நடைபெறுவதாகவும் தகவல்கள் வெளியாகியுள்ளன.
இதற்கிடையே, நடிகர் தனுஷின் ஜாதகம் தொடர்பாக பிரபல ஜோதிடர் ரிக்கி ரத்தன் பண்டிட் வெளியிட்ட கணிப்பும் சமூக வலைதளங்களில் பேசுபொருளாகியது. தனுஷுக்கு அரசியலில் உயர்வுக்கான வாய்ப்பு இருப்பதாகவும், அவர் அரசியலுக்கு வந்தால் முக்கிய எதிர்க்கட்சியாக உருவெடுக்கக்கூடும் என்றும் அவர் கணித்திருந்தார். எதிர்காலத்தில் தமிழக அரசியல் களம் விஜய் - தனுஷ் போட்டியாக மாறலாம் என்ற அவரது கருத்தும் ரசிகர்கள் மத்தியில் கவனம் பெற்றுள்ளது.
அதேநேரத்தில், ரசிகர் மன்றங்கள் மூலம் பொதுமக்களை நேரடியாக சென்றடையும் பணிகளும் அதிகரிக்கப்பட்டுள்ளதாக தகவல் வெளியாகியுள்ளது. கல்வி உதவி, ரத்ததான முகாம்கள், மருத்துவ முகாம்கள், உணவு வழங்குதல் உள்ளிட்ட சமூக நலப்பணிகளில் கவனம் செலுத்தப்படுவதாக கூறப்படுகிறது. அரசியல் கட்சி தொடங்குவதற்கு முன்பே மக்கள் தொடர்பை வலுப்படுத்தும் முயற்சியாகவே இதை அரசியல் நோக்கர்கள் பார்க்கின்றனர்.
இந்த சூழலில் தனுஷின் செயல்பாடுகள் ஆளும் தரப்பின் கவனத்தையும் ஈர்த்துள்ளதாக தகவல்கள் கசிகின்றன. அவரது ரசிகர் மன்றங்களின் கட்டமைப்பு, மாவட்ட அளவிலான செயல்பாடுகள் மற்றும் தொகுதி வாரியான ஒருங்கிணைப்புகள் குறித்து தகவல்களை சேகரிக்க உளவுத்துறைக்கு அறிவுறுத்தப்பட்டுள்ளதாகவும் கூறப்படுகிறது.
மேலும், தனுஷை சுற்றியுள்ள அமைப்புகளின் களப்பணிகள் மற்றும் சமூக வலைதள செயல்பாடுகள் குறித்தும் கண்காணிப்பு மேற்கொள்ளப்படுவதாக தகவல்கள் வெளியாகியுள்ளன.
அரசியல் களத்தில் தனுஷின் அடுத்த நகர்வு என்னவாக இருக்கும் என்பது இன்னும் தெளிவாகாத நிலையில், 234 தொகுதிகளையும் குறிவைத்து ரசிகர் மன்ற கட்டமைப்பை வலுப்படுத்தும் நடவடிக்கைகள் உண்மையிலேயே அரசியல் கணக்கின் ஒரு பகுதியாக இருந்தால், தமிழக அரசியல் களத்தில் புதிய போட்டிக்கு அது வழிவகுக்குமா என்ற எதிர்பார்ப்பு எழுந்துள்ளது.
What's Your Reaction?
